Нерюнгри куоракка ыытылла турар Олоҥхо Ыһыаҕар сахабыт сирин чулуу киһитин, Ил Түмэн бэрэссэдээтэлин солбуйааччытын Александр Николаевич Жирковы көрсөн кэпсэттим.
Маннык диэн ыйыттым: Александр Николаевич, бары билэргит курдук эһиги олоҥхо сайдарыгар элбэх кылааты киллэрдигит, олоҥхо аатын ааттаттарбыт киһи буолаҕыт. Олоҥхоҕо күүстээх тапталгыт туохтан саҕаламмытай?
Александр Николаевич маннык диэн хоруйдаата:
Олоҥхо сайдарыгар диэн буолбакка, төрүт үгэспитин, тылбытын-өспүтүн харыстаан илдьэ хаалларбыт диэн санаам ордук күүстээх. Харыстаан хааллардахпытына биһиги тирэхпит ордук күүстээх буолуо. Онон олоҥхо туһугар маннык сыһыан. Мин кыра эрдэхпиттэн олоҥхо-тойук эйгэтигэр улааппыт киһибин. Аҕам балайда үчүгэй тойуксут этэ. Биһигини уот иннигэр олордон тойуктуурун өйдүүбүн. Биһиги нэһилиэктэн саха улуу олоҥхоһута Дмитрий Говоров муҥха биэрбэт олоҥхону суруйбут киһи, онтон да атыттар элбэх олоҥхоһуттар тахсыбыттара. Ол эйгэ биһиги нэһилиэкпитигэр эрэ буолбакка, мин төрөөбүт түөлбэбэр эрэ буолбакка, оччолорго үгүс сирдэргэ баар этэ. Биһи көлүөнэ ону хаппыт, улааппыт дьоммут. Ол өттүнэн, биһиги эһигиттэн арыый уратылаахпыт буолуо. Ол гынан баран, эһиги, эдэрдэр, олоҥхо төрүт үгэстэр хаттаан сөргүтэр кэмнэригэр олороҕут. Онон кытаатыҥ, түгэни ыһыктымаҥ, уһуллуҥ, үөрэниҥ, бэйэҕитигэр төһө кыалларынан иҥэриниҥ. Ол эһиэхэ олоххутугар туһалаах эрэ буолуоҕа.
Бу дириҥ ис хоһоонноох кэпсэтии биһиги олоҥхобут кэскилин туһунан толкуйдуурга күһэйэр. Эһиги туох санаалааххытый?
Александра ЖЕГУСОВА,
Чөркөөх орто оскуолатын 10 кылааһын үөрэнээччитэ, Таатта