Бүгүн, бэс ыйын 5 күнүгэр, Н.Н. Тарскай аатынан «Туймаада» стадиоҥҥа «Спортивные Якутяне» оскуола оҕолорун спратакиадатын үөрүүлээх аһыллыыта буолла.
Спартакиада аһыллыыта кыттааччылар параадтарыттан саҕаланна. «Спортивные Якутяне» спартакиада түмүктүүр түһүмэҕэр 1029 кыттааччы, 86 представитель, 197 тренер, 35 волонтер өрөспүүбүлүкэ араас муннуктарыттан кэлэн кыттыыны ыла сылдьаллар. Бэс ыйын 8 күнүгэр диэри волейболга, боксаҕа, чэпчэки атлетикаҕа, көҥүл тустууга уонна мас тардыһыытыгар түмүктүүр түһүмэхтэр ыытыллыахтара, бу көрүҥнэргэ кыайыылахтар быһаарыллыахтара.
Тэрээһиҥҥэ Саха Өрөспүүбүлүкэтин Ил Дархана Айсен Сергеевич Николаев кыттыыны ылла, спратакиаданы арыйда. Кини сылтан сыл спордунан дьарыктанар оҕолор, улахан да дьон элбээн иһэллэрин бэлиэтээтэ. Быйылгы спартакиада Кыайыы 80 сылыгар ыытыллара сүдү суолталааҕын эттэ. Спорт — патриотизм биир көрүҥэ буоларын туһаайда. «Оҕолорго, кыттааччыларга тыҥааһыннаах күрэхтэһиини, чиэһинэй киирсиилэри, ким күүстээх, үчүгэй көрдөрүүлээх ол кыайдын!» — диэн баҕа санаатын эттэ.
Саха Өрөспүүбүлүкэтин үөрэнээччилэрин күрэхтэһиитин былааҕын көтөҕүүтүгэр спортка улахан Норуоттар икки ардыларынааҕы, Арассыыйа таһымнаах күрэхтэргэ кыттан ситиһиилэрдээх оҕолор кытыннылар.
Владислав Данилов, чэпчэки атлетика, Бүлүү гимназиятын 9 кылааһын үөрэнээччитэ.
Люба Михайлова, хотугу многоборье, Үөһээ Бүлүү орто оскуолатын 9 кылааһын үөрэнээччитэ.
Антон Григорьев, көҥүл тустуу, Сунтаар 3 нүөмэрдээх орто оскуолатын 10 кылааһын үөрэнээччитэ.
Анна Прозорова, чэпчэки атлетика, Алдан куорат гимназиятын 8 кылааһын үөрэнээччитэ.
Эрхан Смирников, көҥүл тустуу, Д.П. Коркин аатынан Чурапчытааҕы спортивнай оскуола-интэринээтин 10 кылааһын үөрэнээччитэ.
Кыттааччылар ааттарыттан андаҕар тылы Анастасия Николаева, Мииринэй куорат №26-дээх орто оскуолатын үөрэнээччитэ эттэ.
Спартакиада уотун уматыытыгар Арассыыйа Геройдара Филипп Александрович Евсеев уонна Николай Владимирович Евдокимов кыттыыны ыллыллар.
Кыттааччылартан: Вероника Федорова, Хаҥалас улууһун 2 Малдьаҕар орто оскуолатын 10 кылааһын үөрэнээччитэ, мас тардыһыытыгар Арассыыйаҕа бастыыр иһин күрэхтэһии икки төгүллээх чөмпүйүөнэ, Илья Мунгалов, Нерюнгри оройуонун Беркакит бөһүөлэгин №22-дээх орто оскуолатын 9 кылааһын үөрэнээччитэ, боксаҕа Араассыыйа спордун маастарыгар кандидат, боксаҕа Уһук Илиҥҥэ, Арассыйаҕа бастыыр иһин күрэхтэр кыайыылаҕа, Федорова Ирина, Дьокуускай куорат №17-дээх орто оскуола 11 кылааһын үөрэнээччитэ, Бүтүн Арассыыйатааҕы Физическай культура олимпиадатын кыайыылааҕа, спортивнай гимнастикаҕа Бүтүн Арассыыйатааҕы, регионнааҕы күрэхтэр кыайыылааҕа, Текеянов Ярослав, С.П. Данилов аатынан Бэрдьигэстээх орто оскуолатын 8 кылааһын үөрэнээччитэ, мас тардыһыытыгар Арассыыйаҕа бастыыр иһин күрэх кыайыылааҕа.
Күрэх уотун илдьибит хас биирдии кыттааччы бүгүҥҥү күөн күрэс кыттааччыларын сүрэхтэригэр тулууру, дьулууру, инникигэ эрэли сахпыта буолуо диэн эрэнэбит.
Данилов Владислав, Бүлүү гимназиятын 9 кылааһын үөрэнээччитэ : Мин чэпчэки атлетикаҕа кытта сылдьабын. 400м уонна 110м барьердаах сүүрүүгэ уонна эстафетаҕа кыттыахтаахпын. Дьарыктаммытым 3 сыл буолла. «Спортивные Якутяне» спартакиадаҕа иккиспин кыттабын. Ситиһиим элбэх, «Азия оҕолоро» спортивнай оонньулар призерабын, Өрөспүүбүлүкэ 8 төгүллээх чөмпүйүөнэбин. Бэйэбэр эрэллээхпин, кыайыыга дьулуһабын.
Василий Егоров, Арассыыйа биэс төгүллээх, Европа икки төгүллээх чөмпүйүөнэ, спорт үтүөлээх маастара:«Спартакиада оҕолору чөл олоҕу тутуһалларыгар, спордунан дьарыктаналларыгар, сырдыкка дьулуһалларыгар түстүүр. Бу күрэхтэһии биһиги Ил Дархаммыт Айсен Сергеевич Николаев көҕүлээһининэн бөҕүргэммитэ. Оҕолорго ситиһиилэри, кыайыылары баҕарабын. Ханнык баҕар күрэхтэһии бырааһынньык ол иһин хас биирдии түгэнтэн астыналларыгар уонна дуоһуйалларыгар баҕарабын» — диэн бэйэтин санаатын эттэ.
Keskil14.ru