Биһиги эбэбит, Мария Яковлевна, эһэбит Егор Афанасьевич Васильевтар Таатта улууһун Игидэй нэһилиэгэр олороллор. Кинилэр түөрт оҕолоохтор. Икки уол, икки кыыс. Оҕолоро ыаллар.Элбэх сиэннээхтэр.
Уолаттара Петр, Егор уонна күтүөттэрэ суоппар идэтин баһылаан, ыраах айаҥҥа үлэлии-хамсыы сылдьаллар. Ол курдук, биһиги аҕабыт Петр Егорович Васильев оскуолатын бүтэрээт, бэйэтэ баҕаран туран ыраах айаҥҥа туруммута. Араас хоту дэриэбинэлэринэн таһаҕас таһан үлэтин саҕалаабыта. Сыыйа бэйэтигэр «Камаз» массыына ылынан идэтийэн туран үлэлиир.Саҥа дьыл иннинэ үлэ көһүннэ да Саха сиригэр айанныыр.Саҥа дьыл кэнниттэн массыынатын оҥостоот, ыраах Чукотка диэки айанныыр. Ийэм хоту дойдуттан Муома улууһуттан төрүттээх. Аҕам Чукоткаҕа айаннаан иһэн аара Муомаҕа олорор эбэлээхпэр тохтоон, хонон-өрөөн ааһар.Сынньанан баран салгыы хас да суукка устата айанныыр.
Сайынын үлэ көһүннэҕинэ эмиэ айанныыр. Бииргэ төрөөбүт быраата Егор Егорович Васильев, тастыҥ убайыныын норуокка киэҥник биллэр, Васильев Петр Афанасьевичтыын (Шумахердыын) оскуоланы бүтэриэҕиттэн айанныыллар. Ол курдук, кинилэр «Volva», «Reno» массыыналарынан таһаҕас тиэйэллэр.Депутатскайынан, Чукотканан, Магаданынан айанныыллар.
Күтүөттэрэ: Багрынов Афанасий Семёнович «Shahman», «Kamaz» массыыналардаах. Эмиэ таһаҕас тиэйэр. Потапов Евгений Павлович массыынанан Тааттанан, Амманан чох таһыытыгар сылдьар.
Бу курдук, биир дьиэ кэргэнтэн элбэх киһи ыраах айан суоппардара. Дьоҥҥо үтүө өҥөнү оҥорон, олохторун чэпчэтэллэр.Мин эбэлээх эһэм норуокка туһалаах дьону иитэн таһаарбыттарынан киэн туттабын уонна кинилэргэ махтанабын.Уһун үйэни, кытаанах доруобуйаны баҕарабын.
Сардаана Васильева,
VIII кылаас,
Игидэй орто оскуолата, Таатта