Судаарыстыбыннай эксээмэн буолара чугаһаан, эппиэтинэстээх кэм бу кэллэ. Онон хас биирдии оҕо үөрэҕэр өссө күүскэ кыһанан биир кэлим эксээмэннэргэ бэлэмнэнэр.
Муус устар 4-5 күннэригэр Ытык Күөлгэ А.Е. Мординов аатынан Тааттатааҕы лиссиэй саҥа дьиэтигэр улуус үрдүнэн эбии үөрэхтэр буолан аастылар. Барыта түөрт предмеккэ – нуучча тылыгар, профильнай математикаҕа, обществознаниеҕа уонна физикаҕа буолла.
Преподавателлар куораттан кэлэннэр, нэһилиэк оскуолаларыттан барыта 57 оҕону интернакка олордон үөрэттилэр. Оскуоланы мэтээлинэн бүтэрэргэ уонна эксээмэннэрин үрдүк баллга туттарарга сыаллыыр оҕолору ыҥырбыттар.
Биһиги оскуолабытыттан 11 кылаастан иккиэ буолан барбыппыт уонна икки күн устата нуучча тылын консультацияларыгар сырыттыбыт.
Кылааспыт толору этэ. Нуучча тылын уонна литературатын преподавателя Мария Николаевна Галактионова үөрэттэ. Биир кэлим эксээмэн сорудахтарын ырытан көрдөрдө, быһаарда. Киниэхэ олус махтанабын.
Лиссиэй интернатыгар удамыр сыанаҕа наһаа үчүгэйдик хонон, остуолуобайдарыгар босхо аһаан бэркэ сырыттыбыт. Кырдьык, барыта сабыс саҥа, сып-сырдык, киһи көрөн астынар оскуолата.
Консультациялар ороскуоттарын Ил Түмэҥҥэ депутаппыт В.Н. Лебедев уйуммута. Киниэхэ махталбыт улахан.
Бастыкы күммүтүгэр Жатайдааҕы орто анал үөрэх кыһатыттан кэлбит устудьуоннары кытта көрүстүбүт. Биһиги оскуолабытыттан VIII-XI кылаас оҕолоро тиийбиттэрэ. Хас да хайысханан маастар-кылаас ыыттылар: сварка, электроэнергетика, судовождение, робототехника уонна мегатроника, медицинскэй массаж уонна суһал көмө, ас астааһын. Мин медицина өттүнэн бараары сылдьар буоламмын суһал көмө маастар-кылааһын сэргээн көрдүм.
Наһаа үчүгэй, эйэҕэс устудьуоннар барытын бэйэлэригэр көрдөрөн кэпсээбиттэрэ, үөрэппиттэрэ, боппуруостарга эппиэттээбиттэрэ. Ону таһынан дьаарбаҥкалаабыттара уонна кэнсиэр көрдөрбүттэрэ.
Судовождение маастар-кылааһыгар биһиги оскуолабытыгар үөрэнэ сылдьыбыт Костя Кудрины көрсүбүппүт.
Ити курдук барытыгар сылдьан, элбэҕи биллим-көрдүм. Онон олус туһалаах күннэр аастылар.
Ангелина ДАНИЛОВА, XI кылаас, В.И. Ленин аатынан Уолба орто оскуолата, Таатта