Ахсынньы 21 күнүгэр Марфа уонна Сергей Расторгуевтар ааттарнан Саха государственнай циркатыгар Ил Дархан Харыйата буолан ааста. Сахабыт сирин араас улуустарыттан, оскуолаларыттан 700 талааннаах, үрдүк ситиһиилээх, бастыҥ оҕолор мустубуппут. Ил Дархан Харыйата үөрэнээччилэргэ сыл саамай күтүүлээх, улахан тэрээһинэ буолар.
Мин оскуолабыттан буолбакка, Н.Е. Мординов-Амма Аччыгыйа аатынан «Кэскил» оҕо бэчээтин кыһатын юнкорын быһыытынан таһаарыылаахтык үлэлээбитим түмүгэр ыҥырыллыбытым.
Бу долгутуулаах тэрээһиҥҥэ өрөспүүбүлүкэбит Ил Дарханын Айсен Сергеевич Николаевы кытта сэһэргэһэр чиэскэ тиксибитим. Кини дьиҥнээх доҕор суолтатын№ анал байыаннай дьайыылар туһунан санааларын, истиҥ тылларын сэҥээрэн иһиттибит.
Айсен Сергеевичтан дьиҥнээх доҕордуулар бэйэ-бэйэлэригэр өйөбүл буолаллар диэн этиибитин кытта сөпсөһөрүн биллэрдэ. Уонна: «Доҕор диэн эйигин туох эрэ иһин буолбакка, өйүүр, өйдүүр киһи. Дьиҥ доҕордоһуу хос санаата суох буолар», – диэн эттэ.
Мин Айсен Сергеевыһы кытта сөпсөһөбүн. Кини курлук улахан киһи доҕордорун, олох устун бииргэ хардыылыыр дьонун убастыыра, сыаналыыра биһиэхэ үтүө холобур буолар.
Ил Дархан Харыйата олоххо биирдэ буолар, чаҕылхай тэрээһиҥҥэ кыттыыны ылбыппар, ону таһынан Ил Дарханы кытта сэһэргэспиппэр «Кэскил» оҕо бэчээтин кыһатыгар олуһун диэн махтанабын.
Сайыына ДЬЯЧКОВСКАЯ, XI кылаас,
И.Г. Тимофеев аатынан Майатааҕы лиссиэй, Мэҥэ Хаҥалас
Keskil14.ru