Быйылгы үөрэх дьылыгар оскуолабын түмүктүүр сылбар Ил Дархан Харыйатыгар сылдьыбыппыттан үөрэбин. Бу улахан тэрээһин өрөспүүбүлүкэбит бастыҥ үөрэнээччилэрин, спорка, олимпиадалаларга о.д.а. хайысхаларга уһулуччу ситиһиилээх оҕолору түмэр.
Ил Дархан Харыйатыгар сылдьан истиҥ иэйиилэри иҥэринним. Ону таһынан Н.Е. Мординов-Амма Аччыгыйа аатынан “Кэскил” оҕо бэчээтин кыһатын юнкора буоламмын Саха өрөспүүбүлүкэтин үөрэҕин уонна наукатын миниистирин Нюргуна Афанасьевна Соколованы кытта интервьюну уһуллум. Нюргуна Афанасьевна кытта кэпсэтии умсугутуулаахтык барда. Атын атын улуустартан кэлбит “Кэскил” юнкордара бэйэ-бэйэбитигэр көмөлөһөн, биир санаанан биир хамаанда буолан үлэлээтибит. Хас биирдиибит тус эппиэтинэспитин, оҥорор дьыалабыт суолтатын өйдүүр буолан үлэбит таһаарыылаах, түмүктээх буолла.
Онон Ил Дархан Харыйата биһиэхэ умнуллубат өйдөбүллэри хаалларбытын таһынан түмсүүлээх, биир хамаанда буолан үлэлиир үтүө түмүктээх буоларын көрдөрдө.
Арылхан ПЕРЕВАЛОВ, XI кылаас,
Лөгөй лиссиэй-интэринээт, Уус Алдан
Өрөспүүбүлүкэ салайааччытын кытта тэҥҥэ үлэлээтим
Ил Дархан Харыйатыгар сылдьаммын үөрдүм. Бу биһиэхэ улахан чиэс. Манна Сахабыт сирин бары муннуктарыттан бастыҥтан бастыҥ, туйгунтан туйгун үөрэхтээх, дьоҕурдаах үөрэнээччилэр кэлэллэр. Сылаас, истиҥ эйгэҕэ ааста. Тула өттүбүт барыта уот-күөс, үөрүү-көтүү, доҕордоһуу. Маннык тэрээһин биһиэхэ, оскуола үөрэнээччилэригэр олус улахан суолталааҕын өйдөөтүм.
Ону таһынан “Кэскил” юнкора буоламмын Саха өрөспүүбүлүкэтин үөрэҕин уонна наукатын миниистирэ Нюргуна Афанасьевна Соколова юнкордары кытта интервьютун уһуллум.
Мин бэйэм лиссиэйбэр медиа оскуолаҕа оператор оруолун толоробун. Онон миниистири кытта интервьюга оператор үлэтин толордум. “Кэскил” юнкора буоларбыттан бүгүн улаханнык киэн тутуннум. Биһиэхэ маннык эппиэтинэстээх үлэни итэҕэйэн, өрөспүүбүлүкэ салайааччытын кытта тэҥҥэ үлэлииргэ кыах биэрбиккитигэр махтанабын.
Радомир ФЕДОРОВ, XI кылаас,
Лөгөй лиссиэй-интэринээт, Уус Алдан