Сэтинньи 25 күнэ – Тимофей Сметанин төрөөбүтэ 105 сыла
Сэтинньи 22 күнүгэр Кэбээйи орто оскуолатыгар киэн туттар биир дойдулаахпытар Тимофей Сметаниҥҥа аналлаах хоһоон ааҕааччылар күрэхтэрэ ыытылынна.
Бу тэрээһин сыала-соруга: хоһоон ис тутуллаах айымньы буоларынан толору үөрэтии уонна истээччигэ тиэрдэргэ көҕүлээһин, төрөөбүт дойдуга, уус-уран литератураҕа тапталы, ытыктабыллаах сыһыаны иҥэрии.
Манна 17 оҕо Т.Е. Сметанин хоһоонун үөрэтэн дорҕоонноохтук ааҕан иһитиннэрдилэр. Алтыс «Б» кылаас үөрэнээччилэрэ Саша Харлампьева уонна Саша Иванова бэйэлэрэ нууччалыы тылбаастаабыт хоһооннорун аахтылар. Оҕолор ааҕыыларын олохтоох ааптар Н.И. Дьяконова, төрөппүт М.Н. Татаринова, Тимофей Сметанин аймаҕа И.Г. Кобякова уонна 11 «А» кылаас үөрэнээччитэ Маша Левина сыаналаатылар.
Икки бөлөҕүнэн түмүккэ бастыҥнарынан буоллулар — Айыллаана Гуляева (8 кыл. “Көрөрдөөх эбиппин ээ…”), Айсен Егоров (10А, «Хааннаах хара баттах»), иккис миэстэ – Дуолан Павлов (8 кыл, “Саллаат”), Сайаана Терехова (10А, “Мин эһигини талабын”), үһүс миэстэ – Айгуль Кычкина (7Б, «Хаһаайка») уонна Кеша Сметанин (11Б, «Ийэлэрин кытта киирэннэр…»).
Оскуолабыт библиотекара А.А. Егорова Тимофей Сметанин уонна кини олоҕун, айар үлэтин туһунан кинигэлэри билиһиннэрдэ. Хоһоону билии, үөрэтии киһиэхэ улахан суолталааҕын кэпсээтэ: «Хоһоону үөрэтии мин сөбүлүүр дьарыгым. Оҕо эрдэхпиттэн билиҥҥэ диэри үөрэппит хоһооннорбун өйдүү сылдьабын. Хас эмэ сүүһүнэн хоһоону билэбин. Ханна баҕар сылдьан сөптөөх хоһоону аахтахпына аттыбар дьон-сэргэ түмүллэр. Ол курдук хоһоон дьон дууһатын таарыйар уратылаах».
”Хоһоон хоспоҕо” диэн өйдөбүл Иван Романович Петров Тимофей Сметанин туһунан ахтыытыгар баар. Атын ханнык да суруйууга бу тыл ситимэ суох. Хоһоону толору үөрэтэн өйгүтүн-санааҕытын сайыннарыҥ, көстүбэт сүгэһэргитин хаҥатыҥ. Аны олунньуга Иван Романович Петров хоһооннорун үөрэтэн кэлэн кыттаарыҥ» — диэн санаатын үллэһиннэ бырайыак ааптара В.Н. Заровняева.
Түмүккэ, Тимофей Сметанин оҕолорго анаабыт алгыс тылын бары бииргэ аахтыбыт:
Баҕарабын
Туйгуннук үөрэнэргэр,
Кинигэлэрдиин
Бииргэ сылдьаргар,
Кинилэрдиин
Сатаан кэпсэтэргэр!
Уля Максимова, 11А кылаас,
Рита Терехова 11 А кылаас хаартыскаҕа түһэриитэ,
«Нуклеус» пост, Кэбээйи