ЮНКОР ДНЕВНИГИТТЭН
Бу ый устата оскуолабыт үөрэнээччилэрэ олимпиадаларга хастыы даҕаны көрүҥҥэ кыттыннылар. Холобур, мин бииргэ үөрэнэр кыыһым сэттэттэн тахса олимпиаданы ааһан, билигин да кытта сылдьар. Онон оҕолор солото суох сылдьабыт.
Саха тылын олимпиадатын муниципальнай түһүмэҕин кыттыылаахтара бары үөрэ-көтө Ытык Күөлгэ айаннаабыппыт. Бастаан «Юннатские встречи» тэрээһин иһинэн «Станция юных натуралистов» экскурсиятыгар сылдьаммыт араас көтөрдөрү, кыра кыыллары көрбүппүт. Атын оскуолалартан оҕо бөҕөтө кэлбит этэ. Киирээти кытта бары долгун өҥнөөх попугайдарга харахтара хатаммыта. Үс попугайтан саамай кырдьаҕастара 5 саастаах Джульетта диэн этэ. Кини атыттарга холоотоххо, дьоҥҥо үөрэммит, сытыы-хотуу. Ону таһынан саҥарар, эппиэттиир. Попугайтартан ураты маҥан ёжик, хомяк, улиткалар, морской свинкалар, кыһыл көмүс балыктар уонна улахан баҕайы черепахалар бааллар. Кинилэри көрөн баран наһаа соһуйбутум, сэҥээрбитим. «Мин черепахам эмиэ инник улаатар ини» диэн саныы сырыттахпына «попугайдар туһунан камераҕа кэпсээ» диэбиттэригэр тугу билэрбин кэпсээбитим.
Экскурсия кэнниттэн театрга тиийэн улахан тэрээһин саҕаламмыта. Эдэр көлүөнэ айылҕаны, көтөрдөрү харыстааһынын туһунан бырайыактарын, презентацияларын кэпсээн баран, хас кыттар оскуола аайы станцияларынан оонньуулар саҕаламмыттара.
Бүтэһигэр экскурсия ыытааччыта оҕолортон эдэр попугайдарга хайдах аат биэриэххэ сөбүн ыйыппытыгар, Долгунчай уонна Ньургуһун диэн аат толкуйдаабыппыт.
Көтөрдөр туһунан станцияларга барыта 7 хамаанда кыттыбыта. Икки этээһинэн сүүрэн-көтөн бэркэ кыттан иккис миэстэ буолбуппут.
Ол кэнниттэн ыксыы-ыксыы эбиэттээн баран 6 кылаастан саҕалаан 11 кылаастарга диэри оҕолор бары олимпиадаҕа кытта барбыппыт. Биһиги,11 кылаастар, 4 чаас олорон суруйбуппут. Биллэн туран, саха тыла дириҥ, баай тыл буолан ыарахан этэ. Ону ааһан киһи кэтэспэтэх сорудахтара түбэһэн соһуппуттара. Наһаа ыарахан буолбатах этэ эрээри, күннээҕи олоххо көрсөр гороскоп суруйуутун сыыһаларын туһунан ыйытыы кэлбитэ. Онтон бүтэһик сорудах – өйтөн суруйуу. Төрүт тыл наадалааҕын туһунан тиэмэ буолан, киһи илиитэ бэйэтэ суруйан бара турар курдуга. Онон 4 чаас толору биллибэккэ ааспыта.
Ангелина ДАНИЛОВА, XI кылаас,
В.И. Ленин аатынан Уолба орто оскуолата, Таатта