Былатыан Ойуунускай төрөөбүт күнүгэр анаммыт бастакы «Say Saqa» сахалыы квест оонньууга Лөгөйдөөҕү лиссиэй-интернат 2024 сыллааҕы выпускниктарын «Дайар Лөгөй» хамаандата — Айгыына Бурнашева, Дарина Петухова, Арсен Сокорутов, Ваня Колодезников, Коля Олесов 22 хамаандаттан 2-с миэстэ буолары ситистилэр.
Бу бастакы квест оонньууга араас эйгэттэн кэлэн кыттыбыттар, ол курдук «Вести» ГТРК Саха сиринээҕи филиалыттан, «Якутия 24» телеханаалтан, «Чолбон» сурунаал эрэдээксийэтиттэн онтон да атын сурунаал, хаһыат үлэһиттэрэ, учуонайдар, учууталлар, устудьуоннар уо.д.а.
Бастакы миэстэҕэ Өрөспүүбүлүкэтээҕи лиссиэй учууталлара тахсыбыттар, иккис миэстэни «Дайар Лөгөй» хамаанда 0.9 баалынан эрэ хаалан ситистэ, үһүс миэстэ ХИФУ үрдүкү кууруһун устудьуоннарын «Хампа» хамаандата буолбут.
Ыйытыылар араас хайысхаттан бэриллибиттэр, ол курдук сахабыт тылыттан, төрөөбүт литератураттан саҕалаан успуорду, итэҕэли, киинэ эйгэтин хаппыттар.
Оскуолабыт тумус туттар «Лөгөй — Өрөгөй, Лөгөй — Өркөн өй» тыллара өссө биирдэ киэҥ эйгэҕэ дорҕоонноохтук ааттаммыттарынан учууталлар, үөрэнээччилэр олус астынныбыт. Былырыыҥҥы выпускниктарбытынан киэн туттабыт, үөрэхтэригэр ситиһиилэри, бары үтүөнү эрэ баҕарабыт!
Лөгөйдөөҕү лиссиэй-интернат «AjarSitim» медиа бөлөх 10 кылааһын үөрэнээччитэ Мария Тищенко