«КЭСКИЛ» МЕДИА ОСКУОЛА ЮНКОРДАРА СУРУЙАЛЛАР
Сүрэхпит сылааһын анаан сырдаттыбыт
Мин бастакы командировкам Уус Алдан улууһун соҕотох норуодунай поэта Иван Васильевич Мигалкин төрөөбүтэ 70 сылыгар аналлаах тэрээһиннэри сырдатыыга буолбута. «Кэскил» медиа оскуола биһиэхэ анаан үс күннээх командировканы тэрийбитэ.
Бэйэм медиа куруһуокка бастакы сылбын дьарыктанар буолан, олус элбэҕи биллим. Иван Васильевич олоҕун, үлэтин туһунан саҥаны, сонуну арыйдым.
Үс күннээх тэрээһиҥҥэ «Иван Мигалкин оҕолорго сүрэҕин сылааһын барытын анаан, элбэх хоһоону, остуоруйаны суруйбута» диэн элбэхтик ахтан аастылар. Онтон биһиги киниэхэ махтанан, туох баар сүрэхпин сылааһын анаан 70 сааһыгар анаммыт тэрээһиннэри эппиэтинэстээхтик сырдаттыбыт.
Төһө да миэхэ, саҥа саҕалыыр юнкорга ыараханын иһин, сырдатар, суруйар сорукпун толордум диэн астынным.
Янис СЫСОЛЯТИН, VII кылаас,
«Sitim LegMedia» хамаанда юнкора, Лөгөй лиссиэй-интэринээт, Уус Алдан
***
Бастакы командировка улахан уопуту биэрдэ
Саха норуотун поэта, оҕо суруйааччыта Иван Мигалкин 70 сааһыгар аналлаах тэрээһини сырдатыы – мин бастакы командировкам этэ. https://vk.com/clip-199463452_456242290?c=1
Биһиги, «Кэскил» медиа оскуола юнкордара, Мүрүтээҕи «Уолан» гимназия интернатыгар хоно сылдьыбыппыт. Тэрээһиннэр бүппүттэрин кэннэ хонук сирбитигэр тиийээт, үлэбитин оҥорон барарбыт. Ким эрэ ыстатыйа суруйар, ким эрэ видео монтажтыыр, ким закадровай текст ааҕар.
Бэйэм санаабар, бу бастакы командировкам миэхэ улахан уопуту биэрдэ. Наһаа элбэҕи биллим.
Медиа хайысхаҕа үлэлиир ыарахан. Өссө үлэлээн, өссө саҥаны билэн бэйэбин сайыннарыахпын наада.
Туяра МАМОНТОВА, IX кылаас, «Байаҕантай кэскиллэрэ» юнкорпост,
М.Н. Готовцев аатынан Танда орто оскуолата, Уус Алдан
***
«Уолан» гимназия интэринээтигэр махтанабын
Биһиги, Лөгөй лиссиэй-интэринээт юнкор уолаттара? Иван Васильевич Мигалкин үс күннээх тэрээһинин саҕаланыытыгар, Чараҥҥа Кулантай аатынан түмэлгэ саамай эрдэ тиийбиппит. «Кэскил» медиа оскуола биһигини анаан-минээн командировкаҕа ыҥырбытыттан долгуйбуппут, үөрбүппүт оннук улахан этэ.
Биһигини барыбытын кураторбыт Сардаана Анатольевна Матвеева батыһыннара сылдьан олус элбэххэ үөрэттэ. Тэрээһини сырдатыыга сүрүн санааны, толкуйу табатык тиэрдэргэ син үөрэнним дии саныыбын.
Инникитин өссө киэҥник көрөн толкуйдуу үөрэниэххэ наада эбит. Ол инниттэн билиибин-көрүүбүн кэҥэтиэхпин, элбэҕи ааҕыахпын наада.
Мүрүтээҕи «Уолан» гимназияҕа интэринээтигэр хоно сырыттыбыт. Наһаа ыалдьытымсах дьоннор манна үлэлииллэр эбит. Олус кыһаллаллар. Гимназия дириэктэрэ Петр Дмитриевич Пермяков күн аайы киирэн «хайдах хоннугут» диэн ыйыталаһа сырытта.
«Уолан» гимназия дириэктэригэр, интэринээт коллективыгар улахан махталбын биллэрэбин. Барыгытыгар үлэҕитигэр, үөрэххитигэр ситиһиини баҕарабын.
Павел ГЕРАСИМОВ, VIII кылаас, «Sitim LegMedia» хамаанда юнкора,
Лөгөй лиссиэй-интэринээт, Уус Алдан
***
Умнуллубат түгэннэри бэлэхтээтэ
Мин бастакы командировкам умнуллубат түгэннэри бэлэхтээтэ. Саха норуотун поэта, оҕо суруйааччыта Иван Васильевич Мигалкин туһунан олус да элбэҕи биллим. Холобур, суруйааччыга анаммыт научнай-практическай конференцияҕа Иван Мигалкин удьуордарын туһунан биллим.
Дойдуларын, норуоттарын таптыыр, күүстээх өйдөөх-санаалаах улахан дьону иитэн таһаарбыт ийэлээх аҕаларын сөҕө санаатым.
Поэт Иван Мигалкин хоһоонноро оҕолору үөрэтэр, кэрэҕэ сирдиир.
Үс күн устата тугу көрбүппүн, билбиппин ааҕааччыларга тута тиэрдэн, суруйан испитим. Кылгас эрээри киһи дууһатын таарыйар видеону оҥорор, ыстатыйа суруйар чэпчэки буолбатах. Элбэх сыраттан тахсар.
Снежанна ГОТОВЦЕВА, VIII кылаас, «Байаҕантай кэскиллэрэ» юнкорпост,
М.Н. Готовцев аатынан Танда орто оскуолата, Уус Алдан
***
Маннык командировкалар өссө элбии турдуннар!
Мин олохпор бастакы командировкам олус үчүгэйдик ааста. Элбэх оҕону кытта билистим. Уопут бөҕөтө ыллым. Саха норуотун поэта, оҕо суруйааччыта Иван Васильевич Мигалкин туһунан элбэҕи биллим.
Үчүгэйдик видео устарга, хаартыскаҕа сөптөөхтүк түһэрэргэ, ыстатыйаны сөпкө суруйарга, сүрүн санааны сатаан булан ыларга үөрэнним.
«Кэскил» огҕ бэчээтин кыһатыгар биһигини бу курдук такайан илдьэ сылдьыбыккытыгар махталбын тиэрдэбин. Олуһун диэн астынным. Маннык командировкалар өссө элбии турдуннар.
Валерия ГОТОВЦЕВА, Х кылаас, «Байаҕантай кэскиллэрэ» юнкорпост,
М.Н. Готовцев аатынан Танда орто оскуолата, Уус Алдан
***
Дьокуускайтан – Уус Алдаҥҥа
Дьокуускай куораттан атын улууска анаан-минээн командировкаҕа барар диэн улахан эппиэтинэс эбит. Үс күн устата Уус Алдан улууһугар тиийэн үлэлээбиппин олус астына саныыбын. Бастакы командировкам уонна юнкор быһыытынан саҥа сылдьар буоламмын, бастакы күҥҥэ ыарырҕаппытым, эрээри үлэбин үчүгэйдик толорбутум.
Саха норуотун поэта, оҕо суруйааччыта Иван Васильевич Мигалкин төрөөбүтэ 70 сааһын олус истиҥник бэлиэтээбиттэрэ. Кини туһунан элбэҕи билбитим миэхэ туһалыа дии саныыбын.
Юнкор быһыытынан үлэлээн, опыт бөҕөтө ылынным, оҕолору кытта түргэнник тапсар буоллум. Иһитиннэрии, сырдатыы үлэтэ хайдах оҥоһуллан ааҕааччыга, көрөөччүгэ тиийэрин биллим. Бу биһиэхэ, оҕолорго, үөрэхпитигэр, олохпутугар көмөлөөх.
Тэрээһиннэргэ сылдьан көрдөхпүнэ, оҕолор кыра эрээрилэр наһаа үчүгэйдик уруһуйдууллар, кэпсииллэр. Интервью ылбыт оҕолорум аһаҕастык, сайаҕастык кэпсэппиттэрэ миэхэ туһалаах буолла.
Үһүс күммүтүгэр Мүрүтээҕи «Уолан» гимназияҕа сылдьан VIII кылаас үөрэнээччилэрин кытта көрсүбүппүт. Үлэбит туһунан кэпсээбиппит.
Салгыы Иван Васильевич Мигалкин үөрэммит Мүрү 1 №-дээх орто оскуолатыгар сылдьыбыппыт. Мин манна VI кылааска диэри үөрэммитим. Бу сырыыга оскуолабын норуот поэта үөрэммит оскуолата диэн олох атыннык ылынным.
Бииргэ үөрэммит оҕолорбун, учууталларбын көрүстүм. Тапталлаах кылааһым салайааччыта Марья Ильинична саамай бастакынан көрсүбүтүм. Көрөммүн үөрбүтүм аҕай. Ахтыбыт да эбиппин учууталбын!
Командировкабыт «Тойон Мүрү» культура дыбарыаһыгар түмүктэннэ. Улахан сыанаҕа тураммыт улуус салалтатыгар, үөрэх управлениетыгар, «Уолан» гимназияҕа уонна «Кэскил» оҕо бэчээтин кыһатыгар махтанныбыт.
Алеся НИКОЛАЕВА, VIII «Г» кылаас,
Дьокуускай куорат 17 №-дээх орто оскуолата