Майа сэлиэнньэтигэр педагогическай дьаарбаҥка буола турар. Манна 26-с түһүлгэҕэ анал байыаннай дьайыы байыастарыгар көмөлөһөр сыаллаах площадка баар. Ардахова Марианна Васильевнаны, Дьокуускайдааҕы «Саха Волонтер» чилиэнин, кытта кэпсэттим:
— СВО үлэтэ элбэх оскуолаҕа, оҕо тэрилтэтигэр бара турар эбит. Оҕолор маскировочнай сеть, нашлемник, харысхал уо.д.а. оҥороннор, бэйэлэрин сайыннараллар уонна көмөлөһөллөр эбит. Онно учууталлар эмиэ көхтөөх кыттыыны ылаллар. Үөрэнээччилэр анал байыаннай дьайыы кыттыылааҕын Анатолий Храмов хоһооннорун өрө тутан ааҕаллар, — диэн санаатын үллэстэр.
Салгыы Чурапчы улууһун Арыылаах нэһилиэгин оҕолоро бэрт үчүгэй дьыаланан дьарыктаналларын сэргээтим. Андрей Андреевич салайыытынан Старая Русса диэн куоракка сэрии буолан ааспыт сирдэрин хаһаннар, былыргы сэрии саҕанааҕы маллары, ботуруоннары, гранаталары уонна каскалары булбуттар. Бу маннык поисковай үлэнэн дьарыктаммыттара номнуо үһүс сылыгар барбыт.
Антон Захаров, Х кылаас, Чыамайыкы орто оскуолата, ≪Проба Пера≫ медиакиин