Бэс ыйын 26 күнүгэр Дьокуускай куоракка Н.Н. Тарскай аатынан «Туймаада» стадиоҥҥа Норуоттар икки ардыларынааҕы «Азия оҕолоро» VIII спортивнай оонньуу үрдүк таһымнаахтык арылынна. Маннык курдук тэрээһиҥҥэ аан бастакытын сырыттыбыт
Үөрүүлээх аһыллыыга Саха сирин сүүрбэттэн тахса улууһуттан 4 тыһыынча кэриҥэ киһи кыттыыны ылла. Хас биирдии кыттааччы өр кэмҥэ кыһаллан туран бэлэмнэммиттэрэ киһи хараҕар быраҕыллар. Саха сирин туһунан кэпсиир туруоруу ис хоһооно дириҥэ, кыттар дьон таҥаһа-саба мааныта, декорация эгэлгэтэ мустубут дьон сүрэҕин баһылаата.
Аан дойду араас муннугуттан кэлбит спортсменнар парадтарын, көрөөччүлэр ытыс тыаһынан уруйдуу көрүстүлэр.
Өрөспүүбүлүкэбит Ил Дархана Айсен Сергеевич Николаев: «Азия оҕолоро» VIII спортивнай оонньуу быйыл өрөспүүбүлүкэбитигэр биллэриллибит Оҕо саас сылын биир сүрүн тэрээһинэ буолла. Нөрүөн-нөргүй буоллун ыччат доҕордоһуутун түһүлгэтигэр!», – диэн бэлиэтээн туран, оонньуу аһыллыбытын туһунан биллэрдэ.
Сахабыт сирин Бастакы Президенэ, «Азия оҕолоро» спортивнай оонньуу төрүттээччитэ Михаил Ефимович Николаев архыып-видеоларын көрдөрбүттэрин хас биирдиибит кини мындыр толкуйун, инникилээҕи, кэскиллээҕи өтө көрөрүн сөҕө-махтайа, киэн тутта уонна махтана көрдүбүт.
Аан дойду таһымнаах тэрээһин спорт, доҕордоһуу түһүлгэтэ эрэ буолбакка, куораппыт, Саха сирин сайдыытыгар эмиэ улахан оруоллаах. Саҥа спортивнай объектар тутулуннулар, өрөмүөн үлэтэ барда, суол-иис биллэ тубуста.
Спортсменнарга ситиһиини баҕарабыт! Кэлбит ыалдьыттар Саха сирин туһунан үтүө өйдөбүллээх барыахтара диэн эрэнэбит.
«Азия оҕолоро» спортивнай оонньуу аһыллыыта өйбүтүгэр-сүрэхпитигэр өр сылларга умнуллуо суоҕа.
Лилия Чехченнонова, VIII кылаас,
М.Н. Турнин аатынан Тыараһа орто оскуолата,
Нарыйаана Захарова, VII кылаас,
«Айыы Кыһата» национальнай гиназия,
«Азия оҕолоро» пресс-киин юнкордара