Бэҕэһээ бэс ыйын 17 күнүгэр Харбалаахтааҕы үөрэхтээһин холбоһугун бүтэрэр 8 выпускникка үөрүүлээх быһыыга-майгыга аттестаты туттарыы буолла.
Быйылгы оскуоланы бүтэрээччилэр түмүктүүр тургутуктары ситиһиилээхтик туттардылар. Үс бастыҥ үөрэнээччибит Ария Трофимова, Милена Егорова, Аман Федоров оскуола «Бочуотун кинигэтигэр» киллэриллэр чиэскэ тигистилэр.
Ситии-хотуу аттестаттарын холбоһук дириэктэрэ Анна Васильевна Мосоркина туттартаата, үөрэнээччилэрбитигэр кэс тылын тиэртэ. Кылаас салайааччыта эдэр, кэскиллээх учуутал Амгира Даниловна Соломонова ирдэбиллээх, айымньылаах үлэтин иһин төрөппүттэр махталларын ылла. Нуучча тылыгар үөрэппит Ирина Романовна Бястиноваҕа, математик Ксения Владимировна Григорьеваҕа төрөппүттэр махталлара муҥура суох!
Оҕолорбут талбыт үөрэхтэригэр киирэн идэлээх дьон буолан, олох киэҥ аартыгар чиҥник үктэнниннэр!
Валентина Кривошапкина, Харбалаах, Таатта.