Саха сиригэр Оокко бухатыыр туһунан билбэт киһи диэн, бука, суоҕа буолуо. Ордук мас тардыһыытын курдук сахалар күрэхтэрэ ыһыахтан ыһыахха эрэ буолан ааһар буоллаҕына, Оокко күрэхтэһэр буолуоҕуттан «иккис тыынын» ылбыта.
Эмискэ күөрэс гыммыт, күрэстэһээччилэрин барыларын кыайталыыр, иннигэр түһэрбэт бухатыыры сорохтор көрөөрү, сорохтор кыайаары-хотоору дьон бөҕө тоҕуоруһар буолбута. Сахабыт сирин араас муннуктарыгар биллибэккэ-көстүбэккэ сылдьыбыт бөҕөстөр күөн көрсөн, күрэс былдьаһан мас тардыһыытын Саха сиригэр эрэ буолбакка, тас да куораттарга биллэрбиттэрэ. Мас тардыһыыта дьиҥнээх саха оонньуута буоларын дакаастаабыттара.
Оокко бухатыыр – Платон Платонович Прокопьев 1967 сыллаахха Амма Абаҕатыгар Прокопьевтапр дьиэ кэргэттэригэр үһүс оҕонон күн сирин көрбүтэ. Оскуолаҕа үөрэнэр сылларыгар остуол тенниһинэн, хаамыска, хабылык хабыытынан дьарыктанара. Сайыҥҥы сынньалаҥҥа от биригээдэтигэр үлэлээн буһара-хатара. Дьэ, бу кэмтэн Оокко күүстээҕэ биллэн барбыта. Биригээдэҕэ бурдук кууллаах кырбаммыт от мээккэтин таһар тимир улахан таачкалаахтар эбит, билиҥҥинэн тэҥнээтэххэ, «Синтай» трактор бырысыабын курдук. Онтукаларыгар ыскылааттан 20-чэ куул мээккэлэммит бурдук таһалларыгар, 5-6 кылааһы бүтэрбит 7-8 уол кыайбакка, аҕыс айдаанынан аҕалаллара үһү. Биирдэ эмиэ бурдук аҕала бараллар, онно ким кэнниттэн анньарын, ким инниттэн соһорун быһаарсан ньамалаһа турдахтарына, Оокколоро (V-с кылааһы бүтэрбит уол) саҥата суох таачкаларын соҕотоҕун иннин диэки дьүккүс гыннарар да, соһон барар. Оҕолор саҥаларыттан матан таачка кэнниттэн батыһан кэлбиттэр.
Прокопьевтар кэтэх хаһаайыстыбаларыгар сибиинньэ, куурусса, ынах иитэллэрэ. Оскуола оҕото Оокко үүт собуотуттан икки 38-таах толору абырааттаах бөтүөнү, кыһыл илиитинэн ыаҕайа курдук тутан, дьиэтигэр баран иһэрин дьон сөҕө көрөрө. Ити гынан Оокко кими да кытта күрэхтэһэн-куоталаһан көрбөккө, дьоҥҥо-сэргэҕэ биллибэккэ сылдьыбыта.
1990 сыллаахха Абаҕаҕа А.А.Владимиров диэн мас тардыһыыга тренер кэлэн, ыччаты бу спорт көрүҥэр дьарыктаан барар. Оччолорго спортзал дириэктэрэ С.П.Борисов үлэлиирэ. Кини Ооккону спортзалга угуйан аҕалан, уол мас тардыһыытынан дьарыктанан барар. 1994 сыллаахха улуус иһинэн буолбут күрэхтэһиигэ Абаҕа хамаандата кыайар. Дьэ, мантан ылата Оокко аар-саарга аатыран барар. Таарыччы эттэххэ, Оокко сумо диэн тустууга киирсэ сылдьыбыт киһинэн Амматан соҕотох буолуоҕа.
Кини улахан ыйааһыннаах киһи диэтэххэ сымса туттуулаах теннисчит, буулдьа саанан ытыыга оройуон призера, дуобакка күүстээх оонньооччу, нарын куоластаах ырыаһыт этэ.
ХХ үйэ биир күүстээх киһитэ Платон Платонович Прокопьев – Оокко Бухатыыр уос номоҕуттан түспэккэ, үйэттэн үйэҕэ кэпсээҥҥэ сылдьыа диэн эрэнэбит.
«Дойдум миэнэ Абаҕа» кинигэҕэ
Прокопий Карманов – Улаха Боруонньа суруйуутуттан