Сааскы ыйдар бүтэһик күннэригэр, оҕо көмүскэлин күнүн көрсө «Өркөн» оҕону эбии үөрэхтээһин киинин тэрийиитинэн «Сааскы мичээрдэр» диэн бэрт иһирэх аатынан доруобуйаларынан хааччахтаах оҕолорго аналлаах бэстибээл үгэс буолан 14-с төгүлүн ыытыллар.
Бу тэрээһини аан бастаан олоҕун оҕону иитиигэ анаабыт, саталлаах салайааччы, айымньыллаах учуутал, педагог, СР үөрэҕириитин туйгуна, РФ уопсай үөрэхтээһинин бочуоттаах үлэһитэ Мария Гаврильевна Колесова көҕүлээн тэрийбитэ.
Оҕону эбии үөрэхтээһин киинин дириэктэрэ Яков Иванович Колодезников «Сааскы мичээрдэр» тэрээһин туһунан бу курдук билиһиннэрдэ: «Оҕону эбии үөрэхтээһин киинин коллектива доруобуйаларынан хааччахтаах оҕолорго ураты болҕомтобутун уурабыт. Биһиги оҕоҕо анаан ыытар тэрээһиннэрбитигэр үгүс элбэх улууспут тэрилтэлэрэ, үтүө санаалаах дьон кыттыһаллар, өйөбүл буолаллар. Ол курдук, Уус Алдан социальнай харалта управленията, «Ымыы» ураты көрүүлээх оҕолор ийэлэрин түмсүүтэ уонна социальнай партнердар бииргэ кыттыһаммыт «Крылья ангела» диэн саҥа дьыллааҕы бэстибээлбит сылын ахсын ыытыллан, үтүө үгэскэ кубулуйда, үгүс элбэх оҕо уонна төрөппүт махталын ылла.
Бастакы сылларыгар бэстибээл «Дьоҕур аартыга» диэн аатынан Мария Гаврильевна Колесова көҕүлээһининэн ыытыллыбыта. 2005 сылтан «Сааскы мичээрдэр» диэн ааттанан ыытыллар буолбута. Бэстибээл чэрчитинэн 2017 сылтан «Сладкие добрые дела» уонна «С каждого класса — по мягкой игрушке» аһымал акция тэрийдилэр. Бэстибээл сыала-соруга: доруобуйаларынан хааччахтаах оҕолор араас өрүттээх талааннарын арыйыы уонна салгыы сайыннарыы буолар.
Быйылгы акцияҕа кыттыбыт, өйөөбүт оскуолаларбытыгар, уһуйааннарбытыгар биирдиилэн дьоҥҥо махталбытын тириэрдэбит. Барыгытыгар доруобуйаны, улэҕэ үөрэххэ үрдүк ситиһиилэри, дьолу-саргыны баҕарабын!».
Уруһуй күрэҕэр саастарынан арахсан икки бөлөҕүнэн күрэх буолла:
- Кыраларга 1-кы миэстэ Мүрү 2-с оскуолатын 4-с кылааһын үөрэнээччитэ Бурнашева Таня;
- 2-с миэстэ Мүрү 1-кы оскуолатын 4-с кылааһын үөрэнээччитэ Бурнашев Петя;
- 3-с миэстэ Мүрү 2-с оскуолатын 1-кы кылааһын үөрэнээччитэ Бурнашев Тимур ыллылар.
- Улахан бөлөххө 1-кы миэстэҕэ Суотту оскуолатын 8-с кылааһын үөрэнээччитэ Кылаева Ася;
- 2-с миэстэҕэ Суотту оскуолатын 7-с кылааһын үөрэнээччитэ Ушницкай Коля;
- 3-с миэстэҕэ Мүрү 2-с оскуолатын үөрэнээччитэ Лугинов Саша таҕыстылар.
Муҥутуур кыайыылааҕынан Кылаева Ася буолла.
Литература күрэҕэ:
- 1-кы миэстэ Мүрү 1-кы оскуолатын 6-с кылааһын үөрэнээччитэ Арсен Осипов;
- 2-с миэстэ Лөгөй лицей-интернатын үөрэнээччитэ Сивцев Антон;
- 3-с миэстэ Дьокуускайтан Готовцева Лена буоллулар;
- «Бастыҥ научнай үлэ» номинация кыайыылааҕынан Кутуков Антон буолла.
Литература күрэҕин муҥутуур кыайыылаах аатын Мүрү 2-с оскуолатын 7-с кылааһын үөрэнээчитэ Макеева Вика ылла.
Илиинэн оҥоһук күрэҕэ:
- 1-кы миэстэни Суоттуттан Новоприезжая Айыыкуо;
- 2-с миэстэ Мүрү 2 оскуолатын 4 кылааһын үөрэнээччитэ Бурнашева Таня;
- 3 миэстэ Суотту орто оскуолатын 5-с кылааһын үөрэнээччитэ Портнягина Намыына уонна суотту орто оскуолатын 2-с кылааһын үөрэнээччитэ Черосов Егор буоллулар.
Муҥутуур кыайыылааҕынан Кылаева Ася ааттанна.
Ырыа, хоһоон күрэҕэ:
- 2-с миэстэ Чараҥ орто оскуолатын 1-кы кылааһын үөрэнээччитэ Егорова Сандаара;
- Мүрү 1-кы оскуолатын үөрэнээччитэ Мылаханова Анжелина уонна Суотту орто оскуолатын үөрэнээччитэ Портнягина Намыына 3-с миэстэни үллэһиннилэр.
Муҥутуур кыайыылааҕынан Арсен Осипов буолан кыайыы үөрүүтүн биллэ.
Бу тэрээһини ыытыыга улууспут үтүө санаалаах дьоно-сэргэтэ олус көхтөөхтүк кытыннылар. Ол курдук «Минньигэс үтүө дьыалалар» диэн акцияҕа барыта уонтан тахса амтаннаах асчыттар, хаһаайкалар кытыннылар. Анна Ушницкая, Екатерина Иванова, Любовь Босикова, Саргылана Данилова, Ирина Осипова, Елена Орлова, Октябрина Бурцева уонна Любомира Алексеева минньигэс тортарынан оҕолору күндүлээтилэр.
«Оҕолорго бырааһынньыгы бэлэхтиэх» диэн акцияҕа Мүрү 1, 2 оскуолаларын, Уолаттар гимназияларын, Чараҥ, Майаҕас оскуолаларын үөрэнээччилэрэ, «Өркөн» оҕо киинин уонна «Кэскил» уһуйаан иитиллээччилэрэ, үлэһиттэрэ ордук көхтөөхтүк кытыннылар. Бу акция түмүгүнэн барыта 62 сымнаҕас оонньуур хомуллан оҕолорго бэлэх буолла. Урбаанньыт Василена Сухова оҕо бырааһынньыгын дьэрэкээн шариктарынан киэргэттэ. Маны таһынан улуустааҕы инбэлииттэр түмсүүлэрин аатыттан Елизавета Васильева бириистэри олохтоото.
Быйылгы бэстиибээлгэ кэлбит оҕолор төрөппүттэрин кытта үҥкүү-ырыа аргыстаах үөрүүлээх аһыллыыны көрдүлэр. Кинилэри «Энергия үҥкүү бөлөҕө уонна «Өркөн» оҕо киинин иһинэн үлэлиир «Тулуйхан» оҕо эстраднай ырыа студиятын Уус Алданнааҕы филиалын ырыаһыт оҕолоро эҕэрдэлээтилэр. Салгыы «Жемчужина» ырыа хоһоон күрэҕэ буолла. Эбии үөрэхтээһин педагогтарын маастар кылаастарыгар сылдьан элбэҕи биллилэр, саҥаҕа үөрэннилэр. «Бастыҥнар хамсааһыннара» оҕо уонна ыччат түмсүүтүн волонтердара сэргэхситэр оонньуулары ыыттылар. Ол кэнниттэн күрэхтэри үөрүүлээх түмүктээһиҥҥэ кыттыбыт оҕолор бары сымнаҕас оонньуур бэлэх тутан үөрүүлэрэ үксээтэ. Бу кэннэ минньигэс тортары астына дуоһуйа сиэтилэр.
Бу курдук оҕо көмүскэлин күнүн көрсө 14-с төгүлүн ыытыллыбыт ураты көрүүлээх оҕолор «Сааскы мичээрдэр» диэн бэстибээллэрэ үөрүүлээхтик түмүктэннэ. Оҕолор уонна төрөппүттэр астынан үөрэн дьиэлэригэр элбэх бэлэхтэрдээх, сырдык кэрэ санаалаах, үөрэн-көтөн дьиэлэригэр тарҕастылар.
«Өркөн» пресс киин,
Уус Алдан