2023-2024 үөрэх дьыла ситиһиилээхтик, интэриэһинэйдик, уратытык ааста. Оскуолабыт өрөмүөннэнэн, саҥа оскуолаҕа киирбит курдук сананан үөрэх дьылын саҕалаабыппыт. Бириэмэбит барара сүрдээх түргэн, бэҕэһээ эрэ күһүн курдук этэ.
Көмүс күһүн «Я фотограф» диэн күрэх буолбута. Онно таһырдьа тахсан бэриллибит мүнүүтэҕэ айылҕаны хаартыскаҕа түһэрбиппин көмүскээн бастакы миэстэ буолар чиэскэ тиксибитим.
Алтынньы лааҕырдарынан баай ый буолбута. Сэтинньи ыйга ыаллыы сытар Маалыкай сэлиэнньэтигэр баран, пионерияҕа аналлаах коммунарскай сборга иккис миэстэ буолбуппут. Оскуола иһигэр сылын аайы ыытыллар НПК-ка курэҕэр үгүс үөрэнээччи кыттыбыта. Оҕолор бэркэ кэпсээн Ньурбаҕа барар чиэскэ тиксибиттэрэ. «WorldSkiils» агрономия компетенциятыгар бииргэ үөрэнэр кыыспынаан Санаайа Яковлевалыын үс араас түһүмэххэ кыттан I миэстэни ситиһиилээхтик ылбыппыт.
Ахсынньы ыйга Ньурба куоракка РДДМ проект көмүскээһинигэр кыттыыны ылбыппыт. Оскуолабыт саҥа дьылыгар кылааһынан таба тиэмэтигэр фотозона оҥорон бастакы миэстэ буолбуппут. Тохсунньу ыйга оскуола оҕолоро студеннардыын көрсүбүттэрэ. Ирэ-хоро үөрэхтэрин, студент олоҕун туһунан кэпсээбиттэрэ. Олунньу ый саҕаланыыта Мархаҕа «Чуораанчык» медиа киин корреспонденнара Бүлүү бөлөх оройуоннарын иһигэр ыытыллыбыт «СААС» медиафорумҥа кыттыыны ылан, бырайыак, видео көмүскээн «За лучшее видео» номинацияҕа микрофон тутан үөрэн-көтөн кэлбиппит.
Кулун тутар ыйга оскуола кыргыттарыгар биир күн «День моды» ыытыллыбыта. Муус устар ыйга оскуола отчуоттуур кэнсиэригэр уҥкуу бөҕө үҥкүүлээн, ырыа бөҕө ыллаан нэһилиэк олохтоохторун сэргэхситтибит. Мин санаабар, бу сылга саамай улахан ситиһиим диэн ахсынньы ыйга сайаапка биэрэн, араас тэтимнээх боппуруостарга эппиэттээн, онтон өр кэтэһэн «Азия оҕолоро» VIII оонньууларга спортивнай объекка волонтер буолар чиэскэ тигистим.
Оскуолабыт өрөмүөннэнэн, сырдаан турарыттан наһаа үөрэбин. Бу үөрэх дьыла элбэххэ үөрэттэ уонна умнуллубат түгэннэри бэлэхтээтэ. Оскуола араас тэрээһинин ыытыстыбыт, ыыттыбыт, аны эппиэтинэстээх саҥа үөрэх дьыла күүтэр. Махтаныам этэ куруук өйдүү,өйүү сылдьар учууталларбытыгар, баҕабытын барытын туора туппакка олоххо киллэрэн, көнө суолга арыаллаан, сөптөөх сүбэ биэрэллэригэр!
Дайаана Иванова,
X кылаас,
«Чуораанчык» корпост,
Хатыы орто оскуолата, Ньурба