Саха Өрөспүүбүлүкэтин Национальнай бибилэтиэкэтин үлэһиттэрэ 2024 сыл муус устар ыйга «Семейная книжная реликвия» диэн куонкурус биллэрбиттэрин истэн кыттарга быһаарыммытым. Саха сирин араас улуустарыттан элбэх улахан дьон уонна оҕолор кыттыыны ылбыттара. Күрэхтэһиигэ кыттааччы бу бибилэтиэкэ ааҕааччыта буолуохтаах диэн усулуобуйатыгар баара.
Мин кыра кылаастан саҕалаан олоҥхону ааҕан араас куонкурустарга кыттыбыт буолан, эмиэ П.В. Оготоев «Элэс Боотур» олоҥхоттон быһа тардыыны үөрэтэн барбытым. Бу олоҥхо араас омук тылларыгар тылбаастанан тахсыбыт уонна киэҥник биллибит эбит. Бибилэтиэкэттэн уларсан ааҕан олус сөбүлээтим. Элэс Боотур бухатыыр, Сыралыҥса Куо, Симэхсин эмээхсин, Илбис кыыһын оруолларыттан нойосуус аахпытым. Төһө кыалларынан куоласпын уларытан, хамсанан уобарастарын биэрэ сатыыбын. Ону таһынан атын куонкурустарга кыттаары Н.К. Шамаев-Чопчухаан «Дьоруо хоҥор аттаах, дьоллоох-соргулаах Дьорҕостой Бэргэн» диэн олоҥхоттон кылаабынай дьоруой уонна Дьаллаҥса Хара бухатыыр тылларыттан талан быһа тардыылары билбитим.
«Семейная книжная реликвия» өссө дьиэ кэргэнинэн кыттыбыппыт. Бииргэ төрөөбүт балтыларбын, эдьиийдэрбин (төрөөбүт таайым кыргыттарын) эмиэ угуйбутум. С. Васильев «Эрчимэн Бэргэн» олоҥхо дьоруойдарын кинилэр уруһуйдаабыттара, туой буортан бухатыыры оҥорбуттара. Мин сахалыы таҥаспын кэтэн туран барытын сиһилии кэпсээн, «Элэс Боотур» олоҥхоттон толорон видео устан дьүүллүүр хамыыһыйаҕа ыыппытым.
Муус устар 20 күнүгэр түмүк тахсан кыттыылаахтары Национальнай бибилэтиэкэтин периодика отделыгар ыҥыран мустулар. Элбэх киһи кэлбит. Наһаа үчүгэй быыстапка оҥорбуттар. Манна кыттыбыт дьон кинигэни кытта сибээстээх күндү, харыстаан илдьэ сылдьыбыт маллара, оҕолор уруһуйдара, туойтан оҥорбут бухатыырбыт атын кытта тураллар. Саала биир өттүгэр худуоһунньуктар уруһуйдара быыстапкаҕа турар. Биэчэри бу куонкуруһу тэрийсибит Жанна Петровна Григорьева ыыппыта. Кыттааччылар биир-биир тахсан быыстапкаттан ылан бэйэлэрин малларын кэпсээтилэр. Сорохтор бэйэлэрэ айбыт хоһооннорун аахтылар. Мин олоҥхобун аахтым, быыстапкаҕа турар үлэлэрбитин көрдөрөн кэпсээтим. Манна уруучукатынан киһи эрийдэҕинэ собуоттанар патефону сэргии көрдүм. Сэрии инниттэн харыстаан илдьэ сылдьыбыттар. Патефон хаһаайката собуоттаан И.В. Сталин саҥатын уонна былыргы аатырбыт ырыаһыттар ырыаларын иһиттиннэрдэ. Онтон куонкурус түмүктэрин биллэрдилэр. Мин оҕолорго I миэстэни ылан диплом, 3 кинигэни уонна сыаналаах бэлэх туттум. Олус үөрдүм, тэрийбит дьоннорго махталбын тиэрдэбин!
Жанна Петровнаны, бибилэтиэкэ үлэһиттэрин барыларын, ыам ыйын 27 күнүгэр кинилэр идэлээх бырааһынньыктарынан эҕэрдэлиибин!
Оҕолорго этиэхпин баҕарабын: кинигэни таптааҥ, куонкурустарга кыттыҥ, элбэҕи билиэххит-көрүөххүт!
Айтал Необутов,
Дьокуускай куорат 26 №-дээх орто оскуолатын 5-г кылааһын үөрэнээччитэ.