Э.К. Пекарскай аатынан Игидэй орто оскуолата, олохтоох дьаһалта, бэтэрээн Сэбиэтэ, Анна Павловна Варламова аатын сүгэр нэһилиэк түмэлэ кэлэр кэнчээри ыччакка улахан суолталаах тэрээһини тэрийдилэр. Ол курдук, Аҕа дойдуну уоттаах сэрии толоонугар хорсуннук көмүскээбит сэрии бэтэрээннэрин, сэрии кэмигэр үлэнэн фроҥҥа күүс-көмө буолбут тыыл бэтэрээннэрин оҕолоро кэлэн ахтан-санаан аастылар, патриотическай тыыны иҥэрдилэр.
Үс күн устата сүһүөхтэринэн арахсан түөрт кылаас чааһа нэһилиэк түмэлигэр истиҥ-иһирэх эйгэҕэ ыытылынна. Оҕолор байыаннай таҥастарын кэтэн кэлэн оччотооҕу эйгэҕэ киирэн, буолан ааспыт кырыктаах историяны эттэринэн-хааннарынан биллилэр.
7-8 кылаастарга ыытыллыбыт кылаас чааһыгар, ыҥырыылаах ыалдьыт быһыытынан кыттыыны ыллылар: нэһилиэк аҕа баһылыга Егор Алексеевич Марков, оҕолорго бүгүҥҥү ыытылла турар акция суолтатын, ис хоһоонун быһааран биэрдэ. Нэһилиэкпит хорсун буойуттарын, тыыл бэтэрээннэрин өйдүү-саныы сылдьалларын, кинилэр оҥорбут үтүө, хорсун дьыалалара хаһан да үйэлэргэ умнуллубатын туһунан бигэтик санатта.
Көрсүһүүнү иилээн-саҕалаан нэһилиэк бэтэрээн учуутала, бэтэрээн сэбиэтин чилиэнэ София Семёновна Пахомова ыытта.
Саргылаана Алексеевна Иванова, история учуутала оҕолорго ол кэмнээҕи историческай быһыыны-майгыны сааһылаан өйдөттө.
Сэрии толоонугар хорсуннук сэриилэспит буойуттар тустарынан, кинилэр оҕолоро, сиэннэрэ: Зинаида Николаевна Ермолаева Уолбаттан төрүттээх сэрии бэтэрээнэ аҕатын туһунан олус үчүгэй ахтыыны оҥордо. Бу ахтыыттан оҕолор биллилэр, Зинаида Николаевна аҕата сэрииттэн кэлэн иһэн Белоруссияттан төрүттээх ийэтин, белорус кыыһын кэргэн ылан, батыһыннаран аҕалбыт, уонтан тахса оҕоҕо күн сирин көрдөрөн, дьоллоохтук олорбуттарын туһунан кэпсээн, оҕолор сэҥээриилэрин ылла.
Сэрии толоонугар алта бырааттыы Тимофеевтар баран хорсуннук Ийэ дойдуларын көмүскээбиттэрин туһунан сиэн кыыс Мария Григорьевна Егорова олус истиҥник кэпсээн оҕолору сөхтөрдө.
Бу кэпсээнтэн Дэбдиргэҕэ олус сэмэй, хорсун-хоодуот Тимофеевтар бииргэ төрөөбүт уолаттара олорон ааспыттарын оҕолор биллилэр.
Олус долгутуулаах түгэнинэн буолла, ийэлэрэ барахсан улаатан көмөлөһөр саастара буолбут-алтыс уолун сэриигэ, өлөр өлүү айаҕар атаарарыгар абатыттан тэлгэһэтин күрүөтүн маһынан сынньан харааста хаалбыта диэн, дьон-сэргэ ахтыыта баара барыбытын долгутта.
София Семёновна Пахомова ахтыытыттан аймахтыылар уһун кэмҥэ көрсүбэккэ гынан баран, ыраах сэрии толоонугар көрсүбүттэрин туһунан долгутуулаах түгэн үөскээтэ.
Маны таһынан ыҥырыылаах ыалдьыт быһыытынан, бэтэрээн Сэбиэтин бэрэсэдэтэлэ, Аргунова Анна Константиновна кыттыыны ылла, оҕолорго санаатын тиэртэ.
Тыыл бэтэрээнэ, «Баһаарынай сулууспа туйгуна» бэлиэ хаһаайына «Сталин төбөлөөх мэтээлинэн» наҕараадаламмыт, Марков Константин Николаевич, туһунан ахтан-санаан ааста кыыһа Ефимова Варвара Константиновна.
Нэһилиэк аҕа баһылыгыттан бу сыл халандаарын бэлэх туттулар, бүгүҥҥү тэрээһини иилээн-саҕалаан сүрүннэспит дьоммут: Татьяна Эдуардовна Лопатина, Варламова Анна Павловна аатынан түмэл салайааччыта, Любовь Николаевна Захарова, оскуола иитэр үлэҕэ директоры солбуйааччыта,
Саргылаана Алексеевна Иванова, история учуутала. Наталья Борисовна Баннова, 7 кылаас салайааччыта, Александра Васильевна Габышева, 8 кылаас салайааччыта.
Кэлбит ыалдьыттарга оҕолор бэйэлэрин ырыаларын уонна тыыннаах сибэккилэрин, өйдөбүнньүк хартыыналарын бэлэх ууннулар.
Бу курдук, Игидэй нэһилиэгэр кэлэр кэнчээри ыччакка, улахан иитэр суолталаах үлэ, көхтөөхтүк ыытылла турар.
Медиаоскуола иитиллээччилэрэ хас биирдии кылаас чааһын видеоролик устан үйэтитэллэр.
Варвара Ефимова, саха тылын уонна литературатын учуутала,
Э.К. Пекарскай аатынан Игидэй орто оскуолата, Таатта.