Уон сыл үөрэммитим тухары араас өрөспүүбүлүкэтээҕи, оройуоннааҕы күрэхтэһиилэргэ, олимпиадаларга ситиһиилэхтик кыттаммын Москва куоракка барар чиэскэ тиксибитим. Ол курдук, Үөһээ Дьааҥыттан 14 оҕо буолан, муус устар 4 күнүгэр Москва куоракка үктэммиппит. Тиийээппитин кытары улахан оптуобус көрсөн, тута экскурсияҕа ылан барбыта. Кыһыл Болуоссакка сылдьан Кремль уонна Василий Блаженнай храмын көрбүппүт.
Киэһэ түһүөхтээх гостиницабытыгар тиийэн, хас биирдии хоско иккилии оҕо буолан түспүппүт. Хос аайы суунар дууш, суунар тэрил, туалет, кыракый холодильник, полка баара ордук киһини үөрдүбүтэ. Аны дьоммутун кытта кэпсэтэрбитигэр бириэмэбит атын буолан ыарахаттардаах этэ. Ватсабынан эрэ кэпсэтэрбит. Ити курдук, күн аайы араас интэриэһинэй сирдэринэн экскурсиялаатыбыт. Иккис күммүтүгэр “Сколково” диэн аныгы технологиялары оҥорор кииҥҥэ сылдьан, араас интэриэһинэйи көрөн, сөхтүбүт эрэ. Холобур, Роман Костомаров протезтара манна оҥоһуллубут эбит. Аан дойдутааҕы быыстапкаҕа ВДНХ пааркатыгар Арассыыйа саамай улахан МГУ университетыгар уонна Федерация Сэбиэтигэр сылдьыбыппыт. Федерация Сэбиэтигэр киирэрбитигэр паспорт ирдииллэр этэ. Валентина Андреевна Чукрова экскурсияны иилээн саҕалаан ыыппыта. Түмүккэ, Е.А. Борисов аатынан оҕолорго блокнот биэртэлээбитэ. Ону таһынан, бэйэбит «Остров мечты» диэн дьиэ иһигэр баар араас атракционнардаах аралдьытар пааркаҕа сарсыардаттан киэһээҥҥэ диэри күүлэйдээбиппит, оонньообуппут. Өссө “Останкино” телебашняны көрбүппүт. Хас сылдьыбыт миэстэлэрбиттэн бэйэбэр кыракый бэлэх ылынар этим. Куруутун өйдүү сылдьыам диэн.
Мин саамай сөбүлээн, интэриэһиргээн сылдьыбыт сирим “Остров мечты” уонна ВДНХ-ҕа ыытылла турар Аан дойдутааҕы “Арассыыйа” быыстапка. Хас биирдии оҕо курдук, мин эмиэ араас атракционнарга сылдьарбын олус сөбүлүүбүн. Мин санаабар, «Остров мечты» кыра эрдэҕинээҕи баҕа санааҕын толорор. Киһи онно аптаах сиргэ, остуоруйа дойдутугар сылдьар курдук сананар. Оттон быыстапкаҕа хас биирдии субъект бэйэтин уратытын көрдөрөрө киһи интэриэһин олус тардар.
Ол курдук, алта күнү быһа, сааскы уһун өрөбүл кэмигэр хаһан да харахтаабатах улахан куоракка тиийэн, илэ бэйэтин көрөн, элбэх билиини ылан, саҥа доҕоттордонон, оонньоон-көрүлээн кэлбиппиттэн олуһун диэн үөрдүм. Москва куораты көрөн кэлбиппиттэн олох кэмсиниэм суоҕа. Биһигини көрө-истэ сылдьыбыт салайааччыларбар Светлана Васильевнаҕа уонна Мирослава Константиновнаҕа улахан махталбын тиэрдэбин.
Мария Мордовская,
Боронук орто оскуолатын Х кылааһын үөрэнээччитэ, Дьааны улууһа.