Хаҥалас улууһун Кыһыл Үрүйэ сүрүн орто оскуолатын дириэктэрэ Галина Гаврильевна Антипинаны кытта «Үрүйэчээн» пресс-киин эдкора, IX кылаас үөрэнээччитэ Нарияна Антипина кэпсэттэ.
- — Бастатан туран, баһаалыста, бэйэҥ тускунан билиһиннэр. Учуутал идэтин туох санаалаах баһылаабыккытый?
— Мин Кыһыл Үрүйэ уопсай үөрэхтээһин сүрүн оскуолатын 22 сыл салайан кэллим. Мин оскуолаҕа үөрэнэр кэммэр саамай сөбүлүүр уруогум история этэ. Историяны наһаа билиилээх, оҕолорго сүрдээх үчүгэй сыһыаннаах учуутал Александра Матвеевна Козлова үөрэтэрэ. Оскуоланы бүтэрэр сылбытыгар кини миэхэ учуутал идэтин таларбар сүбэлээбитэ. Онон Хабаровскайдааҕы педагогическай институкка үөрэнэ киирэн, 1982 сыллаахха бүтэрбитим.
- Оскуоланы салайарга, эн санааҕар, саамай туох сүрүн ирдэбил баарый?
— Оскуоланы салайарга, аан бастакытынан, дириэктэр билиитин хаҥатан күннэтэ үөрэниэхтээх.Кэллиэгэлэрин, үөрэнээччилэрин, үлэһиттэрин кытта биир тылы булан үлэлиэхтээх. Чиэһинэй,ирдэбиллээх буолуохтаах.
- Биһиги оскуолабыт сүрүн кыһалҕата тугуй?
— Биһиги оскуолабыт аҕыйах ахсааннаах оҕолоох оскуолалар ахсааннарыгар киирсэр. Оҕо аҕыйаҕа – бу биһиги сүрүн кыһалҕабыт буолар. Ол гынан баран, биир өттүнэн ыллахха, оҕону хаачыстыбалаахтык үөрэтиигэ биир олук буолар. Үөрэх хаачыстыбатын орто дии саныыбын, манна биир сүрүн биричиинэнэн учуутал тиийбэтэ буолар.
- Нэһилиэк сайдыытыгар оскуола оруолун туһунан санааҕын үллэстиэҥ дуо?
— Былыр- былыргыттан оскуола нэһилиэк биир баар-суох үөрэх, сайдыы киинэ буолар. Оскуолабыт нэһилиэк уопсастыбаннай олоҕор көхтөөхтүк кыттар. Улахан тэрээһин барыта оскуолаҕа ыытыллар. Олохтоохтор оптуорунньук, чэппиэр күн киэһэ кэлэн волейболлаан, эрчиллэн бараллар.
— Быйыл — Россияҕа Дьиэ кэргэн сыла. Манан сибээстээн ыйыттахха, билигин эн санааҕар, оскуола дьиэ кэргэни кытта хайдах үлэлиэхтээҕий?
— Төрөппүтү кытта үлэни өссө күүһүрдүөхпүтүн наада. Төрөппүттэри кытта бииргэ үлэлээтэхпитинэ эрэ, оскуолабыт өссө үүнүө-сайдыа.
- Оскуола сахалыы тыллаах ханнык хаһыаттарга, сурунаалларга сурутуулааҕый?
— Оскуола «Кэскил» хаһыакка, «Юность Севера», «Чуораанчык», “Колокольчик” сурунаалларга сурутуулаах. Бибилэтиэкэ, учууталлар оҕону ааҕыыга көҕүлүүр сыаллаах элбэх үлэни ыыталлар.