Туризм диэн билигин күүскэ сайдан эрэр дьарык буолар. Киһи барыта үчүгэйдик сынньаныан, сири-дойдуну көрүөн, билиэн баҕарар. Онон Россия үрдүнэн, биһиги Сахабыт сиригэр, билиҥҥи кэм ирдэбилинэн, туризм хайысхата сайдарыгар араас күрэхтэһиилэр ыытыллаллар.
Мин бииргэ үөрэнэр дьүөгэбин Карина Басованы кытта Бүтүн Россия үрдүнээҕи “Эдэр профессионаллар” чемпионаттарын “Туризм” хайысхатыгар региональнай этапка иккис сылын кытынным.
Быйыл учууталбыт Розалия Васильевна Баишева былырыыҥҥыттан күүскэ бэлэмнээн, Дэбдиргэҕэ буолбут улуус иһинээҕи күрэхтэһиигэ түөрт хамаандаттан кыайан, өрөспүүбүлүкэ сүүмэрдиир күрэхтэһиитигэр тиийбиппит. Барыта 13 хамаанда биир бириэмэҕэ онлайн кыттан, биһиги, Уолба хамаандата үһүс миэстэ буолан, биэс хамаанда иһигэр киирэн, салгыы чемпионат региональнай этабыгар ааспыппыт.
Кулун тутар 11-15 күннэригэр Дьокуускай куорат финансовай-экономическай колледжыгар киирэн кытынныбыт. Сүрүн эксперт Елена Михайловна Корякина барыларын көрсөн, чемпионаты ыытта. Үөһээ Бүлүү, Горнай, Мэҥэ Хаҥалас улуустарын, Дьокуускай куорат 31 №-дээх оскуолатын уонна Таатта хамаандалара буоламмыт үс тыҥааһыннаах күн күрэхтэстибит.
Кулун тутар 11 күнүгэр чемпионаты ыытааччылар үлэлиир площадканы билиһиннэрбиттэрэ. Ол кэнниттэн бастакы күрэхтэһиибит күнүгэр үлэлиир сирбитигэр хамаандалар көрсөн бэйэ-бэйэбитин кытта билсибиппит. Иккис күнүгэр күрэхтэһиибит дьэ саҕалыммыта. Сарсыарда аҕыс аҥаар чааска бары тиийэммит бастакы А модуль сорудаҕын ылан бэриллибит үс чаас биэс мүнүүтэҕэ бүтэриэхтээх этибит. Бастаан көмпүүтэргэ олорон презентациябытын саҕалаан баран, клиены кытта кэпсэтэн-ырытан, кини сакааһын толорор гына үлэлээбиппит. Үлэбит олус элбэх этэ. Презентация уонна ырытыыны таһынан дьиҥнээх турфирма курдук дуогабар толорбуппут. Ол курдук сэрэбиэй бырахсан баран төрдүһүнэн тахсан көмүскээбиппит.
Мин санаабар, былырыыҥҥыга холоотоххо бу сырыыга үлэбит түргэтээбит уонна тупсубут. Ол эрээри син биир долгуйбуппут, уһуннук кэпсээбиппит, түмүгэр бириэмэбитигэр ыктарбыппыт.
Үһүс күммүтүгэр дьэ хомулламмыт, долгуйбуппут ааһан, күүскэ үлэлээбиппит.
Иккис Б модуль сорудаҕын ылан саҥа туристическай продукт үс чаас биэс мүнүүтэ иһигэр оҥорон иккиһинэн презентациялаабыппыт. Ол күн, мин санаабар, үчүгэйдик кыттыбыппыт, учууталбыт биһигини хайҕаабыта.
Төрдүс күн бүтэһик күммүт этэ. Онно икки модулунан үлэлээбиппит — В уонна Г. В модуль 2 ч. 35 мүн. э устата этэ, ол иһин түргэнник туттан-хаптан бүтэрбиппит. Сорудахха Приморскай кыраай национальнай «Зов тигра» диэн пааркатын сайдыытыгар тугу гыныахха, эбиэххэ сөбүн туһунан презентация оҥорбуппут. Онтон Г модуль букатын атын этэ. Онно үлэлииргэ биир эрэ чаас биэрбиттэрэ. Сүрдээх интэриэһинэй уонна ыарахан соҕус буолбута. Онно оҕо туризмын хайдах Саха сиригэр сайыннарыахха сөбүн ырытан, оҥорон кэпсээбиппит, экспертэр эбии ыйытыыларыгар хоруйдаабыппыт.
***
Бу курдук түөрт күн биллибэккэ ааста. Маннык күрэхтэһиилэргэ кыттан киһи сайдар, саҥаны билэр, түргэнник туттар, сытыы, булугас, көмпүүтэри баһылыыр буолар эбит дии санаатым. Ону таһынан кыттыбыт оҕолорго, кинилэр салайааччылырыгар кыттарга аналлаах форма биэрбиттэрэ.
Бүгүн олус үөрүүлээх сонун туттубут. Түмүкпүт биллибит. Биһиги III миэстэ буолбуппут. Сотору наҕараадабытын тутуохпут. Учууталларбыт, төрөппүттэрбит олус үөрдүлэр.
Биһиги хамаанда быйылгынан кыттан бүттүбүт, кэлэр сылга саҥа оҕолору учууталбытын кытта бэлэмниэхтээхпит, көмөлөһүөхтээхпит. Учууталбар Розалия Васильевнаҕа, айаммыт ороскуотугар көмөлөспүт оскуолабыт директорыгар Алексей Валентинович Аржаковка уонна төрөппүттэрбэр махтанабын.
Ангелина ДАНИЛОВА, Х кылаас, Уолба, Таатта