Биһиги, 8-11 кылаас үөрэнээччилэрэ, кулун тутар 1-5 күннэригэр Дүллүкү — Дьокуускай хайысханан олус интэриэһинэйдик сынньанан, айаннаан кэллибит. Ааспыт сыл бүтүүтүгэр Ороһу нэһилиэгэр «Ороһутааҕы Сынньалаҥ Киин» тэрилтэ, «Иэйэхсит» оҕо бөлөҕө уонна И.Е.Иванов — Уйбаан Ороһуунускай аатынан модельнай библиотека оскуола оҕолоругар анаан аан дойду остуоруйаларын сахалыы тылбаастаан туруорар улуустааҕы аһаҕас күрэх-тэрээһини ыыппыта. Ол тэрээһиҥҥэ биһиги, бүрээт омук «Өйдөөх кутуйах» диэн остуоруйатын сахалыы тылбаастаан, инсценировка туруорбуппут. Иккис миэстэ буолан, Дьокуускайга баран кэлэр путевканан наҕараадалыммыппыт.
Дьэ, ол курдук кэтэһиилээх айаммыт саҕаламмыта. Куоракка кэлбит күммүт сарсыныгар сахалыы тыыннаах «Айыы Кыһата» национальнай гимназияҕа ыалдьыттаабыппыт. Саҥа ый үүнүүтүн көрсөр тэрээһиҥҥэ сылдьан алгыс ылбыппыт, оскуоланы көрбүппүт. Биһигини биир дойдулаахпыт, поэт Уйбаан Ороһуунускай төрөппүт кыыһа, директоры үөрэх чааһыгар солбуйааччы Тюркяна Ивановна Сергеева үөрэ-көтө көрсүбүтэ.
Салгыы Хаҥалас улууһун Өктөм нэһилиэгэр баар П.И. Шадрин аатын сүгэр 150 саастаах оскуолаҕа сырыттыбыт. Сабыс-саҥа, киэҥ-куоҥ оскуолаҕа үөрэнэр оҕолору ымсыыра санаатыбыт. Ол кэннэ Билим дьоҕус академиятыгар сылдьан үөрэнэр, дьарыктанар кылаастарын, коворкинг көрбүппүт, актовай саалаҕа мустан сэһэргэспиппит. Бу аныгылыы, билиҥҥи ирдэбилгэ толору эппиэттиир оҥоһуулаах оскуоланы сөҕө-махтайа көрбүппүт. Салгыы биһиги «Орто Дойду» зоопаркаҕа тиийбиппит. Мин тигри уонна үрүҥ эһэни, бизону бастакыбын көрөн олус соһуйбутум. Үрүҥ эһэ дьүһүнэ, кэпсииллэрин курдук наһаа сырдык буолбатах эбит, оттон тигр наһаа кыраһыабай этэ. Айаннаан иһэн оҕолор тохтоон сноубордунан дуоһуйа хатааһылаабыттара.
Дьокуускайга төннөн, сынньанан баран киэһэ Эрхаан сольнай кэнсиэригэр сылдьыбыппыт. Алексей, Катя Чкрш, Умсуура, Серж, Оелана, Макс, Гуля уонна Эрхаан ырыаларын дуоһуйа истибиппит. Концерт бүппүтүн кэннэ артыыстары уонна блогер Уруйдаананы кытта хаартыскаҕа түһэн олус үөрбүппүт. Оҕолор бары наһаа астыммыттара. Бүтэһик күммүтүгэр бары «Сулус» катокка хаҥкылыы барбыппыт. Ол кэннэ 203 кварталга баран туруору сыыртан сырылыы оонньообуппут, күүлэйдээбиппит. Кулун тутар 5 күнүгэр сарсыарда төттөрү айаҥҥа туруммуппут.
Мин бу сырыыбар урут сылдьыбатах сирдэрбэр сырыттым, элбэҕи биллим-көрдүм, үөрэн аҕай кэллим. Биһигини салайан илдьэ сылдьыбыт учууталларбытыгар Н. М. Степановаҕа, А.Л.Васильеваҕа уонна маннык кэрэхсэбиллээх айаны бэлэхтээбит «Оллоонноон олорон остуоруйалаһыах» куонкурус тэрийээччилэригэр ис сүрэхтэн махтанабы!
Степания Григорьева, VIII кылаас,
Хаартыскаҕа түһэрдэ: Сааскыйа Васильева,VIII кылаас,
Дүллүкү, Үөһээ бүлүү