Биһиги оскуолабытыгар Владимир Ильич Ленин аата иҥэриллибитэ 100 сылыгар аналлаах “Сырдык суолунан” диэн үс сыллаах кыраайы үөрэтиигэ үлэлээбит бырайыакпыт түмүктэннэ.
Оскуолабыт историятын туһунан ыҥырыллыбыт ыалдьыттарга кылаас чаастарыгар кэпсээтибит. Биһиги, VI кылаас оҕолоро, “Кинилэр дириэктэринэн үлэлээбэттэрэ” диэн тиэмэҕэ ирдэбил үлэ ыытан кылааспыт иһигэр музей-муннук оҥорон ыалдьыттарга билиһиннэрдибит. Оскуолабытыгар араас сылларга уопсайа 45 дириэктэр үлэлээн ааспыт. Кинилэр хас биирдиилэрэ оскуола сайдыытыгар кылааттарын киллэрбиттэрэ.
Семён Мефодьевич Кочкин дириэктэрдиир кэмигэр оскуолабытыгар Ленин аатын туруулаһан ылыыны ситиспит, саҥа оскуола тутуллан үлэҕэ киирбит, пионер, комсомол тэриллибит. Өссө Москваҕа үөрэнэ барар кэмигэр Надежда Константиновна Крупскаяны көрсөн, оскуолаҕа кинигэ арааһын аҕалар эбит. Онон кини үлэлиир кэмигэр Уолба оскуолатыгар үөрэх-иитии үлэтэ тупсарыгар, материальнай базата бөҕөргүүрүгэр, айылҕаны харыстааһыҥҥа билиитин биэрбитэ.
Розалия Николаевна Корнилова оскуолабытыгар сүдү кылааты киллэрбит дириэктэр буолар. Кини үөрэх систиэмэтигэр 50 сыл үлэлээбит. Улахан икки этээстээх 52 сыл үлэлээбит оскуола дьиэбитин туруорсан туттарбыт. Хомойуох иһин, ол оскуолабыт хаарбах туруктаах буолан, ааспыт сылга көспүппүт, хас да сиринэн үөрэнэ сылдьабыт.
Илюштома Ильинична Атласова үтүө үгэскэ кубулуйбут сылын аайы ыытыллар “Уолба сулустара” ырыа, “Көтө-дайа кустуктана” үҥкүү, “Олимпийскай ааҕыылар” НПК, “Казарма” о.д.а бырайыактары көҕүлээн тэрийбит.
Билиҥҥи дириэктэрбит Алексей Валентинович Аржаков. 2015 сылллаахха информатика учууталынан үлэлии кэлбитэ. 2018 сыллаахха дириэктэр солбуйааччытынан үлэлээбитэ уонна 2020 сылтан дириэктэрдиир. Билигин саҥа таас оскуола тутулларын туһугар үлэлэһэ сылдьар.
Алёна ТАППЫРОВА, VI кылаас, Уолба, Таатта