Өрөспүүбүлүкэтээҕи «Муус устар» ыччат бэстибээлигэр «Детство – горизонты будущего» диэн хайысхаҕа кыттыыны ыла кэлбит эдэр кэрэспэдьиэннэр көрөн-истэн, дуоһуйа сынньанныбыт.
Тэрээһин үрдүк таһымнаахтык ааста. Үгэс быһыытынан, хас биирдии кыттааччыга «Муус
устар» диэн эмбилиэмэлээх суумка бэлэх туттардылар. Бастакы этээскэ бэстибээл сүрүн партнерун
«Эльгауголь» тэрийиитинэн хаартыскаҕа түһэр сирдэри туруорбуттар. Оттон иккискэ 14 араас интэриэһинэй маастар-кылаастардаах, куонкурустаах корнердар тэриллибиттэр.
«Открой Якутию» туризм уонна ыалдьытымсах буолуу эйгэтигэр сахалыы таҥастаах Зимушкалыын хаартыскаҕа түһүү, виртуальнай ачыкы көмөтүнэн Өлүөнэ остуолбаларынан экскурсия уонна Арассыыйа бары муннуктарын кэрийбит айанньыты, блогеры Алексей Жирковы кытта көрсүһүү, автограф ылыы буолбута. Бу корнер салайааччытын СӨ урбаан, атыы-эргиэн уонна туризм миниистирэ Тимур Юрьевич Хандыны кытта көрүстүм. «Мин санаабар, «Открой Якутию» корнер ыччакка Ийэ дойдуга тапталы күүһүрдэр. Киһи видеоролик уһулан, бэйэтин улууһун, өрөспүүбүлүкэтин туһунан элбэҕи билэр буолар», – диэн Тимур Ханды санаатын үллэһиннэ.
Тэрээһин саамай чаҕылхай түгэнэ, биллэн турар, кэнсиэр буолар. Кэнсиэри Арассыыйа блогера, ырыаһыта Эсмиральда Данилевская, ырыаһыт, блогер, артыыс Арина Данилова, ырыаһыт, блогер Александр Желобцов, режиссер, продюсер, «Бастакы канал» ыытааччыта Тимур Соловьев иилээн-саҕалаан ыыттылар.
Дойдуга Дьиэ кэргэн сыла биллэриллибитинэн, бу бэстибээл сыанатыгар тапталлаахтар Алена Петрова уонна Николай Васильев көрөөччүлэр иннилэригэр сүрэхтэрин холбоотулар, «Ыал буолуу» туоһу суругу ыллылар.
Бэстибээл хайысхаларын түмүктэринэн наҕараадалар туттарылыннылар. Ону таһынан биллиилэх ырыаһыттар ырыаларын бэлэхтээтилэр: Хабиб, Chris Yank, Галя Виноград, Айсен Аммосов, Кэскил Баишев, Анхароб, Дапсы, FLOW, Виталий Очиров уо.д.а. Бу курдук үрдүк таһымнаах тэрээһиҥҥэ сылдьыбыппыттан олус астынным.
«Кэскил» оҕо бэчээтин кыһатын, «Бэс Чагда» оҕону сынньатар уонна чэбдигирэр киин үлэһиттэригэр махталбытын тиэрдэбит.
Джулианна ДОРОФЕЕВА,
VIII кылаас,
И.Л. Кондаков аатынан Бүлүү гимназията