Олунньу 13 күнүгэр Хайахсыт нэһилиэгэр култуура уонна сынньалаҥ киинигэр Саха өрөспүүбүлүкэтин Бырабыытылыстыбатын 2023 сыллааҕы үлэтин отчуоттуур мунньаҕа буолан ааста.
Отчуоттуур бөлөҕү Саха өрөспүүбүлүкэтин Тыатын хаһаайыстыбатын миниистирин солбуйааччы Николай Степанович Афанасьев салайан кэллэ. Мунньах ааспыт сылга ыытыллыбыт бырабыыталыстыба үлэтин отчуоттуур киинэ матырыйаалынан саҕаланна.
Маны тэҥэ бу күн Ийэ тыл уонна сурук-бичик күнэ буолан, сынньалаҥ киинин үлэһитэ Игнатий Каженкин “Куруубай Хааннаах Кулун Куллустуур” олоҥхотуттан быһа тардан толордо.
Оскуолабыт учуутала Анна Георгиевна Яковлева таас уопсай дьиэ тутуутун, биһиги нэһилиэкпитигэр быраас да, фельдшер да суоҕун, бу боппуруостар хайдах быһаарыллыахтарын сөбүн туһунан ыйыталаста.
«Уопсай дьиэ тутуута былааҥҥа киирбитинэн, 2025 сылтан саҕаланыаҕа. Чурапчы улууһугар быйыл целевой программанан 5 быраас кэлиэхтээх, онтон биирдэстэрэ эһиги нэһилиэккитигэр ананыаҕа», – диэн Егор Афанасьевич Сивцев эппиэттээтэ.
Салгыы МФЦ, саҥа амбулатория дьиэтин тутуутун туһунан, водоочистной сооружениенан Чурапчы улууһа хааччылларын, тыа хаһаайыстыбатыгар сыһыаннаах боппуруостарын туруорсан, олохтоохтор ыйытыылара туһааннаах эппиэти ыллылар.
Хайахсыт дьоно-сэргэтэ ситэриилээх былаас отчуоттуур мунньаҕын “үчүгэйинэн” сыаналаатылар.
***
Биһиги отчуот кэнниттэн нэһилиэк олохтоохторун санааларын ыйыталастыбыт.
Мотрена Егоровна Протасова, Хайахсыт олохтооҕо, пенсионер:
– Мин 2023 сыллааҕы Саха өрөспүүбүлүкэтин отчуотун астына иһиттим. Биһиэхэ тыа дьонугар сүрдээх тиийимтиэтик, боростуойдук быһааран кэпсээтилэр.
Анна Афанасьевна Романова, оҕо садын үлэһитэ:
– 2023 сыллаах үлэ түмүгүн иһиттим, астынным. Өрөспүүбүлүкүбэт сайдарыгар элбэх үлэ былааннанара киһи сүргэтин көтөҕөр. Бэйэм икки оҕолоох ыал ийэтэ буоларбынан, быраас суоҕа миэхэ да, нэһилиэк да олохтоохторугар улахан кыһалҕа буолар. Ити ыйытыыбытыгар эппиэт ылан астынным уонна быраас кэлэрин эрэнэ күүтэбит.
***
Салгыы отчуоттуур бөлөх салайааччытын Саха өрөспүүбүлүкэтин Тыатын хаһаайыстыбатын миниистирин солбуйааччы Николай Степанович Афанасьевичтан эмиэ интервью ыллыбыт.
– Николай Степанович, 2024 сылга ордук үлэ ханнык хайысхатыгар болҕомто уурулларый?
– Бырабыыталыстыба үлэтэ дьон олоҕун таһымын үрдэтиигэ сыаллаах-соруктаах ыытыллар. Онон ити хайысхаларга олох бары салааларыгар 2024 сылга үлэ күүскэ ыытыллыаҕа.
– Быйыл Россияҕа Дьиэ кэргэн, Саха өрөспүүбүлэкэтигэр Оҕо саас сылынан биллэрилиннэ. Ол чэрчитинэн туох үлэ-хамнас ыытыллара былааннанарый?
– Оҕо аймах сылын сүрүн тэрээһинэ «Азия оҕолорун» оонньуулара буолар. Спорт көмөтүнэн ыччаты эйэлээх олоххо тардыы үлэ биир сүрүн тутула буолар.
– Нэһилиэкпитигэр буолбут бүгүҥҥү отчуот Эн санааҕар, хайдах аастай?
– Отчуот үчүгэйдик ааста. Олохтоохтор нэһилиэк сайдыытыгар санааларын эттилэр. Нэһилиэнньэ үc сүрүн боппуруоһу туруорда: МФЦ тутуута, суол уонна иһэр уу.
– Николай Степанович, эппиэттэриҥ иһин махтал!
***
Маннык мунньахха бастакыбытын сылдьар буоламмыт, биһиэхэ олус интириэһинэйдик ааста. Кырдьык, баар кыһалҕаны нэһилиэк олохтоохторо кистээбэккэ этэллэрэ, туруорсаллара сөптөөх.
Бу курдук үрдүк дуоһунастаах бырабыытылыстыба үлэһиттэрэ хас биирдии нэһилиэк дьонун тус санааларын истэн, боппуруостарыгар эппиэттээн, барбыт үлэни отчуоттуура наадалаах уонна туһалаах диэн көрдүбүт.
Тапталлаах Хайахсыппыт тупсарыгар, сайдарыгар өссө да элбэх үлэ былааннанарын истэммит үөрдүбүт.
Айсена ФЕДОТОВА, Х кылаас,
Изольда ХАРЛАМПЬЕВА, IX кылаас,
Хайахсыт, Чурапчы