Бүгүн, олунньу 2 күнүгэр, Н.Е.Мординов‒Амма Аччыгыйа аатынан «Кэскил» оҕо бэчээтин кыһата Мэҥэ Хаҥалас улууһун Ф.Г. Охлопков аатынан Майа орто оскуолатыгар Илин эҥэр улуустарын икки ардыларынааҕы «Саас» медиа-форуму тэрийдэ. Манна Таатта, Уус Алдан, Амма, Чурапчы, Мэҥэ Хаҥалас оскуолаларыттан, уопсайа, 21 хамаанда оҕолоро видеоролик устан күөн көрүстүлэр. Форум түмүгүнэн кыайыылаахтар «Бэс чагда» оҕону чэбдигирдэр киинигэр кэлэн, өрөспүүбүлүкэтээҕи «Муус устар-2024» ыччат бэстибээл «Детство — горизонты будущего» хайысхатыгар кыттар кыаҕы ыллылар.
Мэҥэ Хаҥалас улууһун муниципальнай оройуон баһылыгын социальнай боппуруостарга уонна имиджевай бэлиитикэҕэ солбуйааччыта Альбина Григорьева, үөрэҕэрии салаатын начальнига Гаврил Толстяков, социальнай бэлиитикэ салаатын начальнига Октябрина Кулешова, Н.Е.Мординов‒Амма Аччыгыйа аатынан «Кэскил» оҕо бэчээтин кыһатын дириэктэрэ Ольга Семенова эҕэрдэ тылларын эттилэр.
Оҕолорго анаан үс хайысханан маастар-кылаастар ыытылыннылар:
- Видеоны хайдах уһулар, таҥар туһунан видеограф Аэлита Мир кэпсээтэ;
- Сценарийы хайдах сөптөөхтүк суруйар туһунан Сардаана Матвеева сырдатта;
- Алтан орто оскуолатын дириэктэрэ, спортивнай комментатор Степан Посельскай суруналыыс идэтин туһунан кэпсээтэ.
Ону тэҥэ «Кэскил» оҕо бэчээтин кыһатын дириэктэрэ Ольга Семенова, үөрэхтээһин инновационнай сайдыытын дириэктэрэ Дмитрий Титов медиа-киин салайааччыларыгар, оскуола дириэктэрдэригэр, нэһилиэк баһылыктарыгар анаан «Оскуола нэһилиэк бүгүҥҥүтэ, кэлэр кэскилэ» диэн стратегическай сиэссийэни ыыттыллар.
Оҕолор салгыы хамаанданан үлэлээтилэр: сэрэбиэйинэн биир тиэмэни тардан ылан, түбэспит тиэмэҕэ 2 мүн. уһуна суох видео уһулан көмүскээтилэр. Дьүүллүүр сүбэ тиэмэни төһө арыйбытын, этэр санаата сонунун, ис хоһооно дириҥин, видео хаачыстыбатын, киһиэхэ тиийимтиэтэтин көрөн сыаналаата. Бу кэмҥэ Ф.Г. Охлопков аатынан Майатааҕы орто оскуола «Феникс» актива кыттааччыларга сэргэх оонньуулары тэрийдэ.
Уопсай түмүгүнэн «Бэс чагда» лааҕырга кэлэн, «Муус устар-2024» финалыгар кыттыыны ылары ситистилэр:
- 1 миэстэ — А.П.Илларионов аатынан Хайахсыт орто оскуолата, Чурапчы;
- 2 миэстэ — Танда орто оскуолата, Уус Алдан;
- 3 миэстэ — Ф.Г. Охлопков аатынан Майа орто оскуолата, Мэҥэ Хаҥалас;
- «Бастыҥ ыытааччы» анал аат — Алена Ксенофонтова (Хадаар орто оскуолата, Чурапчы), Гаврил Прокопьев (Төҥүлү орто оскуолата, Мэҥэ Хаҥалас), Дарина Басыгысова (Лөгөй орто оскуолата, Уус Алдан).
Маны тэҥэ «Бастыҥ видео иһин» Төхтүр орто оскуолата (Мэҥэ Хаҥалас), «Видеону айымньылаахтык оҥорон таһаарыы иһин» Тыараһа (Таатта) уонна В.П. Ларионов аатынан Майа (Мэҥэ Хаҥалас) орто оскуолаларын хамаандалара пятличка-микрофон атыылаһар сертификатынан наҕараадаланнылар.
Тэрээһин хайдах ааспытын көрүөҕүҥ:
Кыттааччылар аҕыйах кэм иһигэр дириҥ ис хоһоонноох, айымньылаах видеороликтары уһулан, медиа эйгэҕэ бэйэлэрин кыахтарын көрдөрдүлэр. Салгыы ситими быспакка, оскуолаларын, төрөөбүт дойдуларын сонуннарын, дьонун-сэргэтин сырдаталларыгар баҕарабыт. Сүүмэрдэммит хамаандаларга «Муус устар-2024» ыччат бэстибээлигэр ситиһиилэри, кыайыыны-хотууну!
Ф.Г. Охлопков аатынан Майа орто оскуолатын үлэһиттэригэр улахан махталбытын тиэрдэбит.
Снежана Воронова.
Аэлита мир видеоҕа устуута, таҥыыта.