Бүгүн от ыйын 17 күнүгэр «Өрөгөй» спорт уораҕайыгар Олимпийскай чөмпүйүөн, үс төгүллээх Аан дойду чөмпүйүөнэ, көҥүл тустууга СССР үтүөлээх спордун маастара Павел Павлович Пинигин чиэһигэр ыытыллар көҥүл тустууга Бүтүн Арассыыйатааҕы аһаҕас турнир уонна Норуоттар икки ардыларынааҕы көҥүл тустууга күрэх үөрүүлээх быһыыга-майгыга саҕаланна. Бу күрэх сүрүн спонсорынан «Железные дороги Якутии» акционернай хампаанньа буолар.
![](https://keskil14.ru/wp-content/uploads/2024/07/IMG_9157-1024x768.jpg)
![](https://keskil14.ru/wp-content/uploads/2024/07/IMG_9147-1024x768.jpg)
Быйылгы күрэх икки түһүмэххэ арахсар. 2009-2010 сыллааҕы төрүөх уолаттарга Бүтүн Арассыыйатааҕы (сүрүн судьуйа Дьулус Сивцев) уонна 18 саастарагыр диэри уолаттарга Норуоттар икки ардыларынааҕы (сүрүн судьуйа Алексей Цыренов). Манна Беларусьтан, Казахстантан, Кыргызстантан, Монголияттан, Амурскай, Брянскай, Москва, Калининградскай, Иркутскай уобаластартан, Чечня, Ингушетия, Бурятия, Тыва, Дагестан өрөспүүбүлүкэлэриттэн, Красноярскай, Хабаровскай, Забайкальскай кыраайдартан, Еврейскай Автономнай уокуруктан уонна Саха сириттэн уопсайа 700 тахса эдэр тустуук кыайыы иһин киирсиэҕэ.
![](https://keskil14.ru/wp-content/uploads/2024/07/IMG_9127-1024x768.jpg)
Саха Өрөспүүбүлүкэтин спортка уонна физическэй култуураҕа миниистэрэ Леонид Спиридонов Саха сирин бырабыытылыстыбатын уонна министиэристибэ аатыттан кыттааччылары, тренердэри, көрөөччөүлэри эҕэрдэттэн тыл этиитин саҕалаата. Бу күрэх кыттааччыларын ахсаана сылтан-сыл аайы элбээн иһэрин, ол аата бу күрэх кэскиллээҕин туһунан санаатын үллэһиннэ. Ону таһынан бу соторутааҕыта биһиги уолаттарбыт Лев Павлов уонна Андрей Мидловец Европа первенствотын чөмпүйүөннэрэ буолбуттара Саха сирин тустуута сайдан иһэрин көрдөрөр диэн бэлиэтээтэ. Түмүгэр күрэх сүрүн спонсордарыгар «Железные дороги Якутии» акционернай хампаанньаҕа Алексей Местниковынан сирэйдээн махталын тириэртэ.
![](https://keskil14.ru/wp-content/uploads/2024/07/IMG_9133-1024x768.jpg)
Бу үөрүүлээх быһыыга-майгыга Саха сирин эдэр, кэскиллээх тустууктарыгар Дмитрий Павловка, Уйгун Бурцевка, Ариан Винокуровка уонна Эрхан Куличкиҥҥа көҥүл тустууга спорт маастарыгар хандьыдаат удастабырыанньатын туттардылар.
![](https://keskil14.ru/wp-content/uploads/2024/07/IMG_9122-1024x768.jpg)
![](https://keskil14.ru/wp-content/uploads/2024/07/IMG_9142-1024x768.jpg)
Тэрээһин үөрүүлээх арыллыытын «Добун» этнофольклорнай бөлөх уонна эдэр ырыаһыт Сулустаан Копырин киэргэттилэр.
![](https://keskil14.ru/wp-content/uploads/2024/07/IMG_9130-1024x768.jpg)
Олимпийскай чөмпүйүөн, үс төгүллээх Аан дойду чөмпүйүөнэ, көҥүл тустууга СССР үтүөлээх спордун маастара Павел Павлович Пинигин чиэһигэр ыытыллар 2009-2010 сыллааҕы төрүөх уолаттарга көҥүл тустууга Бүтүн Арассыыйатааҕы аһаҕас турнир киирсиилэрэ бүгүҥҥэттэн саҕаланнылар. Финал киирсиилэрэ от ыйын 19 күнүгэр буолуохтара.
Ким күүстээх кыайдын!
keskil14.ru