«Азия оҕолоро» норуоттар икки ардыларынааҕы спортивнай оонньуулар номнуо 6 күнүн ыытылла тураллар. От ыйын 1 күнүгэр баскетбол көрүҥэр финалга тахсыы иһин полуфинальнай киирсиилэр ыытылыннылар. Комсомольскай болуоссакка күүстээхтэн күүстээх хамаандалар мустан, көрөөччүлэргэ сүрдээх тыҥааһыннаах киирсиилэри көрдөрдүлэр.
Ол курдук полуфиналга кыргыттар оонньууларыгар Беларусь, Саха, Казахстан хамаандалара уонна Урал федеральнай уокуруга кииристилэр. Уолаттарга Таиланд, Узбекистан, Урал федеральнай уокуруга уонна Беларусь сүүмэрдэммит хамаандалара.
Армен Оганесян
3×3 баскетбол судьуйата Армен Оганесян этэринэн, саамай күүстээх, биир да хотторуута суох инники иһэр хамаанданан Беларусь өрөспүүбүлүкэтэ буолар. Кинилэр финал иһин киирсиигэ Урал федеральнай уокуругун кытта овертаймҥа, ол эбэтэр очко тэҥнэһиитин кэннэ өрө күүрүүлээх оонньууга 15:14 ахсаанынан кыайан, финалга таҕыстылар. Кыргыттарга Беларусь хамаандата эмиэ кимнээҕэр да күүстээх, барыларын баһыйан иһэр.
Урал федеральнай уокурук баскетболисткалара Алина Немирова (капитан) уонна Ангелина Аннагельдиева:
— Биһиги санаабытыгар хас биирдии хамаанда үрдүк таһымнаах, бары кыайыыга дьулуурдаахтар, тиһэҕэр диэри киирсэллэр. Бэйэбит оонньуубутун күн аайы көрөбүт, сыыһаларбытын быһаарабыт уонна аныгыскы күнүгэр көннөрөргө кыһаллабыт. Билигин Саха сирин хамаандатын кытта оонньоотубут. Кыргыттар үчүгэй бэлэмнээхтэр, сатамньылаахтар, кыайыыга улахан дьулуурдаахтар, кольцо анныгар сылдьаллар. Тренердара күүскэ бэлэмнээбит дии санаатыбыт, ол эрэн биһиги кыайыыны ыллыбыт. Биллэн турар, бэйэбит санаабытыгар биһиги фавориттар буолабыт, ол эрэн түмүгү көрдөххө, Беларусь уһулуччу үчүгэй. Утарылаһааччы хамаанданы хаһан баҕарар сыаналыахха наада. Финалга 100% киирсиэхпит, туох баар сырабытын барытын ууруохпут.
Өрө күүрүүлээх оонньуулар сарсын 11:00 чаастан саҕаланыахтара, онно уолаттарга 1 миэстэ иһин Узбекистан уонна Беларусь киирсиэхтэрэ, 3 миэстэ иһин Таиланд, Урал федеральнай уокуруга. Кыргыттарга 1 миэстэни Беларусь, Урал федеральнай уокуруга, 3 миэстэни Саха уонна Казахстан өрөспүүбүлүкэлэрин хамаандалара былдьаһыахтара.
Ким кыайыыны ыларын сарсын билиэхпит!
Анжелина Жданова, оҕо пресс-киинэ.
keskil14.ru