Олунньу 18 күнүгэр Дьокуускайдааҕы 31-с орто оскуолатыгар истиҥник күүтүллүбүт тэрээһин буолан ааста — 4 «А» кылаас үөрэнээччилэрэ кукольнай театр остуоруйатын туруордулар. Бу күҥҥэ оҕолор, төрөппүттэр, эбээлэр уонна учууталлар биир сомоҕо буолалларын көрдөрдүлэр.
Спектакль кэнниттэн кылаас үс үөрэнээччитэ бэйэлэрин санааларын үллэстилэр.
Сиэн оруолун аахпыт Егоров Эрэл куукуланнан салайыы чэпчэкитин бэлиэтээтэ.
«Сахалыы куоластаан оонньуурбун астынабын. Көрөөччүлэргэ үөрүүнү уонна күлүүнү тиэрдээри гынабын».
Сүрүн оруолу Сээркээн сэһээнньит оруолун аахпыт Васильев Вася. Кини Сочига, Москваҕа уонна Санкт-Петербурга конференцияларга элбэхтэ кыттыыны ылбыт, саха тылын туһунан чинчийэр үлэлээх.
«Көрөөччүлэр саха тылын таптыылларын, туруорууну өйдүүллэрин баҕарабын».
Попов Вася эмиэ куоластыыр уонна куукуланы салайар.
«Сахалыы тылбыт салгыы сайдарыгар кэҥииригэр уонна оҕолор сахалыы кинигэни элбэхтик ааҕалларын баҕарабын».
Оҕолор кэнниттэн эбээлэр тыл эттилэр, үөрүүлэрин үллэһиннилэр. 4 «А» кылаас эбээлэрэ оҕолорун кытта тэҥҥэ үлэлииллэр уонна бары куукулалары бэйэлэрэ оҥорбуттар. Кинилэр Ф. И. Авдеев аатынан Оҕо айымньытын дыбарыаһын учууталларын кытта бииргэ үлэлээн, оҕолорго араас творческай бырайыактары оҥороллор.
«Биһиги бастаан куукулалары иистээн-тигэн саҕалаабыппыт. Ол кэнниттэн кукольнай театры, таҥастары оҥорбуппут. Оҕолор спектакль нөҥүө культураларын билсэллэр, бэйэлэрин көрдөрө үөрэнэллэр. Оттон биһиги, эбээлэр, оскуола олоҕор наадалаахпытын эрэллээхтик ылынабыт».
Кинилэр кылаас эбээлэрин түмсүүтүн тэрийбиттэр. Эбээлэр кылаас иһинэн ыытыллар араас тэрээһиннэргэ көхтөөхтук кытталлар.
Кылаас салайааччыта Семёнова Ольга Дмитриевна этэринэн, оҕолор бастакы кылаастан төрдус кылааска диэри фольклор куруһуогар араас хайысхаларынан дьарыктаналлар. Ермолаева Екатерина Егоровна көмөтүнэн оҕолор норуот араас оонньууларын, остуоруйаларын, чабырҕахтарын, тойуктарын билсэллэр. Бу барыта уөрэтиллибит хоһооннор ырыалар алгыстар бука барыта биир бырааһынньыкка кэлин түмүллэллэр.
«Оҕолор спектакль нөҥүө сахалыы саҥарарга үөрэнэллэр, интонацияны иэйэн билэллэр, төрөөбүт историяларын өйдүүллэр».
Сценарийдары суруйар, оруоллары үллэстэр — Ермолаева Екатерина Егоровна, Ф. И. Авдеев аатынан Оҕо айымньытын дыбарыаһын фольклор уонна сахалыы саҥарар тыл куруһуогун салайааччыта. Кини 4 «А» кылааһы кытта холбоһон үлэлиир, оҕолорго норуот тылын-өһүн, фольклору чугастык билиһиннэрэр.
Куукулалар уонна декорациялар чааһынан көмөлөһөр — Захарова Наталья Николаевна, Ф. И. Авдеев аатынан Оҕо айымньытын дыбарыаһын уруһуй куруһуогун салайааччыта. Кини куукулалары киэргэтэр уонна гримниир.
Кинилэр бу спектакль бэйэлэрин бастакы улахан туруоруулара буолбутун бэлиэтээтилэр. Салгыы тэрийэр-көмөлөһөр үлэлэрин кэҥэтэн, атын да кылаастардыын үлэлэһэн спектакль туруорар былааннаахтар.
Власова Нина Викторовна уонна Таманнырова Евгения Анатольевна «Орлята России» хамсааһынын туһунан кэпсээтилэр. 31-с оскуола бу хамсааһыҥҥа өрөспүүбүлүкэҕэ биир бастыҥ буолар.
«Бүгүҥҥү тэрээһин — саха кылаастарын көрдөрүүтэ, 4-с кылаас бүтэрин бэлиэтээһинэ. Бары кыттыылаахтар: оҕолор, эбээлэр, төрөппүттэр».
Билигин «Орлёнок-родитель» диэн саҥа хайысханы үлэлэтэн эрэллэр уонна маннык түмсүүлэр оскуола олоҕор наһаа наадаларын бэлиэтээтилэр.
Спектакль Култуура сылын чэрчитинэн тэрилиннэ уонна оҕо, эбээ, төрөппүт, учуутал биир сомоҕо буолуутун холобура буолла. Бу курдук түмсүүлэр оҕолор бэйэлэрин култуураларын билэр, төрөөбүт тылларын таптыыр, улахан дьону ытыктыыр киһилии майгылаах буолан улааталларыгар көмөлөһөллөр.
Кэскил14.ру