Тохсунньу 21 күнүгэр С.К. Макаров аатынан Чурапчы гимназиятыгар ураты тэрээһин буолла. Дириэктэр сүбэһитэ Анна Петровна Ховрова уонна педагог-тэрийээччи Кристина Александровна Кириллова көҕүлээһиннэринэн «Дьоһуннааҕы кэпсэтии» дьарыга тэрилиннэ. https://max.ru/join/mwQKTzgOgUx0GKAQGHHcKysb432FtcAWEYH5AUZQ79U
Ол курдук, Чурапчы нэһилиэгин баһылыга Владимир Дмитриевич Сивцев, гимназия дириэктэрэ Юрий Михайлович Слепцов «21-с үйэ тумус туттар киһитэ. Кини кимий?» диэн дьоһуннааҕы кэпсэтиини иилээн-саҕалаан ыыттылар. Дьарыкка С.К. Макаров аатынан «Гимназия өрөспүүбүлүкэтин», Одьулуун орто оскуолатын «Кулуһун», С.А. Новгородов аатынан Чурапчы орто оскуолатын «Сулус», С.Т. Захаров аатынан Төлөй орто оскуолатын «Тэтим», А.П. Илларионов аатынан Хайахсыт орто оскуолатын «Эрэл», И.Е. Федосеев аатынан Дириҥ орто оскуолатын «Алые паруса», И.М. Павлов аатынан Чурапчы орто оскуолатын «Патриот» оҕо хамсааһынннарын актыбыыстара кыттыыны ыллылар.
Билиҥҥи үйэ актыбыыс, лидер оҕото хайдах буолуохтааҕын туһунан бэрт интэриэһинэй кэпсэтии таҕыста. Оҕолор араас ыйытыыларыгар хоруйдары иһиттилэр.
Түмүккэ Владимир Дмитриевичка махтанан туран “Гимназия өрөспүүбүлүкэтин” оҕо хамсааһынын актыбыыстарын аатыттан махтал суругу уонна бэйэбит оҥорбут статуэткабытын бэлэх ууннубут. Ону тэҥэ бүгүҥҥү тэрээһиҥҥэ көхтөөх кыттыыны ылбыт актыбыыстарбытыгар махтал суруктары уонна бэлэхтэрбитин туттардыбыт.
Кэпсэтии кэнниттэн гимназия актыбыыстара оҕолорго анаан «Идэҕин таба тал» диэн квест-оонньууну ыыттыбыт. Оҕолору хамаандаларга араарбыппыт. Уонна профориентационнай хайысхалаах, олус интэриэһинэй станцияларынан оонньоттубут.
Онтон рефлексия, ол эбэтэр санаа атастаһыыта, буолла. Бары бииргэ олорон билсэн-көрсөн, кэпсэтэн, ыллаан-туойан, бириэмэбитин туһалаахтык атаардыбыт.
Бу курдук, оҕолору түмэн, биир санаалаахтарбытын кытта алтыһан, туһалаах тэрээһини ыытаммыт олус астынныбыт. Владимир Дмитриевич «хас биирдии киһи бэйэтин кэнниттэн тугу эмит хаалларар сыаллаах-соруктаах олоруохтаах» диэн этиитинэн сирдэтэн мэлдьи көхтөөх буоларга дьулуһуохпут.
Дайаана ЗАХАРОВА, Х кылаас, «Тумус кыһа» медиа-киин,
С.К. Макаров аатынан Чурапчы гимназията
Видео Ванесса Евграфова, Афоня Местников, VIII кылаас