Алексей Елисеевич Кулаковскай-Өксөкүлээх Өлөксөй «Оттоку олук алгыһа» диэн хоһоонун бэркэ сэҥээрэн аахтым. Билиҥҥи кэм ыччатыгар анаммыт, биһиэхэ анаммыт алгыс дии санаатым. Ис хоһоонугар баар тыллартан ырытан көрдөхпүнэ, кырдьык оннук.
Холобур, «Алҕаатаҕым буоллун саҥа ыччаппын» диэн тыллары ааҕан баран, Өксөкүлээх Өлөксөй биһиэхэ олус да үтүө, кэрэ баҕа санааларын анаабыт эбит. Кини биһигини, оҕолору, инники олохпутугар барыта этэҥҥэ буоллун диэн алҕаабыт. Үтүө доҕоттордоох, элбэҕи, кэрэни толкуйдуур буолууну, олоххо элбэх ситиһиини, үлэҕэ-хамнаска табыллыыны, дьоллоох олоҕу баҕарбыт. Бу хоһоон, мин санаабар, биһиги дьоллоохтук олоруохтаахпытын, үтүө дьон буолуохтаахпытын санатар, өйдөтөр.
Мин бу хоһоону ааҕан баран, бэйэм эмиэ үтүө, дьоллоох киһи буолуохпун, доҕотторбор, чугас дьоммор, төрөөбүт дойдубар үчүгэйи эрэ оҥоруохпун баҕардым. Онон саҥа үүммүт 2026 сылы Өксөкүлээх Өлөксөй алгыһынан арыйабын.
Сайаана ФЕДОРОВА, VI кылаас,
С.Д. Флегонтов аатынан Хадаар орто оскуолата, Чурапчы