Оскуолабын түмүктүүр бүтэһик сылбар Ил Дархан Харыйатыгар сылдьар чиэскэ тигистим. Маннык улахан тэрээһиҥҥэ ыыппыт оскуолабар, учууталларбар дириҥ махталбын тиэрдэбин.
Ил Дархан Харыйатын кэмигэр, ахсынньы 21 күнүгэр, Саха өрөспүүбүлүкэтин үөрэҕин уонна наукатын миниистирин Нюргуна Афанасьевна Соколованы кытта көрсөн кэпсэттибит. Бу көрсүһүүнү Н.Е. Мординов-Амма Аччыгыйа аатынан «Кэскил» оҕо бэчээтин кыһата тэрийэн ыытта. Бастыҥ үлэлээх медиа оскуола юнкордара талыллан киирбиппит биһиэхэ улахан эппиэтинэс этэ. Онон кыратык долгуйбуппут эрээри Нюргуна Афанасьевна биһигини кытта наһаа истиҥник үөрэ-көтө кэпсэттэ https://vk.com/wall-199463452_25980
Мин 2024 сыл Саха өрөспүүбүлүкэтигэр биллэриллибит Оҕо саас сылын туһунан ыйытыыны биэрдим. Сыл устата элбэх тэрээһиннэр ыытылыннылар. Ол барыта эһиилги 2025 сылга салҕаныа дуо диэн интэриэһиргээтим.
Нюргуна Афанасьевна бэлиэтээн эппитинэн, Оҕо саас сылыгар ылыллыбыт былааннар тэрээһиннэрэ барыта ыытыллан этэҥҥэ түмүктэнэн эрэллэр. Өрөспүүбүлүкэ былааныгар киирбит 49 улахан тэрээһини ыытыыга бары күүһү, кыаҕы ууран элбэх үлэ ыытыллыбыт.
2024 сыл балаҕан ыйын 1 күнүттэн биһиги өрөспүүбүлүкэбитигэр «Моя первая профессия» диэн саҥа бырайыак үлэтин саҕалаабыт. Онно «1200 оҕо суруйтарбыта» диэн үөрэх миниистирэ сырдатта. Кэлэр сылга бу бырайыак салгыы үлэлээн, 10-тан тахса тыһыынча оҕону хабан үөрэтэр сыал-сорук турар эбит.
Бу бырайыак өрөспүүбүлүкэ сайдыытын кытта ыкса ситимнээх. Тоҕо диэтэххэ, оҕо оскуолаттан саҕалаан, Саха сирин сайдыытыгар туһалаах, наадалаах идэлэри баһылыырга сыал-сорук туруорунуохтаах, олоҕун, үлэтин онно туһаайан оҥостуохтаах, дойдутугар туһалаах киһи буолан тахсарга дьулуһуохтаах.
Кэпсэтиибит түмүгэр Н.А. Соколоваҕа «Кэскил» оҕо бэчээтин юнкордара бэлэх туттардыбыт. Быйылгы үөрэх дьылыгар алын кылаас үөрэнээччилэригэр аналлаах «Орлята России» федеральнай бырайыак «Өксөкү сиэннэрэ» диэн сахалыы тылынан оҥоһуллан тахсыбыта. «Орлята России»-«Өксөкү сиэннэрэ» бэлиэлэрин хартыына гынан оҥорон таһаарбыппытын Нюргуна Афанасьевнаҕа туттардыбыт.
Люба СЕРГЕЕВА, XI кылаас,
С.Д. Флегонтов аатынан Хадаар орто оскуолата, Чурапчы
Оператордар Радомир Федоров, Арылхан Перевалов, XI кылаас,
Легөй лиссиэй-интэринээтэ, Уус Алдан