Бүгүн, ахсынньы 19 күнүгэр, Ил Дархан Айсен Николаев Ил Түмэҥҥэ Туһаайыытын оҥордо. Бу туһунан Ньурба улууһун «Хаҥалас» муниципальнай тэриллии баһылыга Серафим Александрович Винокуров эдэр кэрэспэдьиэннэрдиин бэйэтин санаатын кытары үллэһиннэ.
«Ил Дархаммыт Айсен Сергеевич Николаев Туһаайыытыгар үүнэр 2025 сылы Ийэ дойдуну көмүскээччи сылынан биллэрбитин мин билигин дойдубутугар буола турар быһыыга-майгыга сөптөөх быһаарыныы диэн сыаналыыбын. Анал байыаннай дьайыыга сылдьар уолаттарбыт онно сөптөөх холобур буолаллар. Хас биирдии киһи дойдуга бэриниилээх буоларга дьулуһуохтаах уонна олоҕун төрөөбүт дойдута чэчирии сайдарын туһугар үлэлиэхтээх.
Кэлэр сылга үлэбит Улуу Кыайыы 80 сылыгар ананан ыытыллыаҕа, ол быһыытынан Сквер Победы өрөмүөннэнэн, саҥардыллан оҥоһуллуо, хомойуох иһин, биһиги кэккэбитигэр билигин сэрии бэтэрээнэ, тыыл бэтэрээнэ суохтар, онон болҕомтону сэрии сылларын оҕолоругар ууран үлэни ыытыахпыт», — диэн иһитиннэрдэ нэһилиэкпит баһылыга.
Ил Дархан Айсен Николаев этиилэрэ биһиги өрөспүүбүлүкэбитин инникитин түстүүр суолталаахтар.
«Ыллык» эдкорпост, Хаҥалас, Ньурба.