2024 сыл оҕолорго туох өйдөбүлү хаалларда?

П.С. Егоров аатынан Акана орто оскуолатын 6-7 кылааһын үөрэнээччилэрэ ааспыт 2024 сыл түмүктэрин туһунан санааларын үллэстэллэр.

Оҕолор маннык ыйытыыларга хоруйдаатылар:

1. 2024 сыл саамай үөрүүлээх түгэннэрэ?
2. 2024 сылга ситиһиилэриҥ?
3. Бу сылга туох табыллыбата?
4. 2025 сылга туох саҥаны билиэххин, туох сатабылга үөрэниэххин баҕараҕын?

Нарыйаана Неустроева, 6 кылаас:

1. 2024 сылга саамай үөрүүлээх түгэннэрим – дьиэ кэргэммин, аймахтарбын кытта атаарбыт кэмнэрим.
2. 2024 сылга ситиһиилэрим – хонтуруолунай үлэлэри үчүгэйдик толоруу.
3. 2024 сылга 1 чиэппэри барыта «биэһинэн» бүтэрэрим табыллыбата, «Дьоҕур» лааҕырга сылдьыбатым, сайын эмтэнэ барбатым.
4. 2025 сылга ВПР-бын үчүгэйдик туттарыахпын, 3,4 чиэппэрдэри «биэһинэн» бүтэриэхпин баҕарабын.

Айта Афанасьева, 6 кылаас:

1. Алтынньы ыйга дьүөгэбинээн биир уолу, элбэх кыргыттары кытта билсибитим. Кинилэр казах омуктар, кинилэри кытта кэпсэтэргэ чэпчэки, саамай чугас табаарыстарым буоллулар.
2. Волейбол күрэхтэһиилэригэр сылдьар буоллум, чугас дьоннорбун кытта сылдьабын.
3. Сороҕор дьоммун кытта сыыһа кэпсэтэрим, үөрэҕим эмиэ наһаа үчүгэй буолбатах.
4. 2025 сылга чэпчэки атлетика диэн ВУД баар буолуон баҕарабын. Сүүрүк буолар баҕалаахпын.

Сахаайа Семенова, 6 кылаас:

1. Саамай үөрүүлээх түгэним сайын этэ: мин эдьиийдэрим, бырааттарым, балтыларым биһиэхэ сайылыы кэлбиттэригэр бассыайыҥҥа сөтүөлээн, оонньоон уонна аһылык буһаран пикниктээбиппит.
2. 2024 сылга 5 кылааска сылдьан ВПР үчүгэйдик туттарбытым.
3. Новосибирскайга күүлэйдээн кэлэрим табыллыбата.
4. Мин 2025 сылга ВПР үчүгэйдик туттарыахпын баҕарабын. Мас тардыһыытынан дьарыктанан саҕалыам.

Cайыына Федорова, 6 кылаас:

1. От ыйын 11-29 күннэригэр «Виктория» диэн лааҕырга сылдьыбытым. Элбэх табаарыстаммытым. Саамай өйдөөн хаалбыт күнүм «Королевская ночь».
2. Мин санаабар, мин кыайыым – элбэх, үчүгэй табаарыстаммыппар. Ийэм доруобай сылдьара.
3. Үөрэҕим табыллыбата.
4. 2025 сылга үөрэхпин тупсарыахпын баҕарабын.

 Cемен Николаев, 6 кылаас:

1. 2024 сылга «IT-Алтан» диэн лааҕырга сырыттым. Лааҕырга саҥа доҕор булуннум, элбэҕи биллим. Миэхэ саҥа телефон, саҥа таҥас ылбыттара.
2. 2024 сылга программированиеҕа үөрэнним, бэйэм саайт, оонньуу оҥордум. Уруһуй күрэҕэр «Ньургун Боотуру» уруһуйдаан 1 миэстэ буолбутум.
3. Биологияҕа «2» сыананы ылбытым.
4. 2025 сылга «IT-Алтан» диэн лааҕырга өссө барыахпын баҕарабын. Ыраах дойдуга барыахпын баҕарабын. Убайым Саша сайын Аканаҕа кэлэн мин төрөөбүт күммэр сылдьыан, доҕотторбун кытта билсиэн баҕарабын.

Тимур Афанасьев, 7 кылаас:

1. Сайын Ньурбаҕа «Дьоҕур» лааҕырга сылдьыбытым, элбэх табаарыстаммытым.
2. Ситиһиилэрим: лааҕырга күрэх бөҕө ыыппыттара, онно А.С. Пушкин төрөөбүт күнүгэр аналлаах тэрээһиҥҥэ биир күрэххэ бастаабытым. Элбэх олимпиадаҕа кытынным. Саха тылыгар, нуучча тылыгар, олоҥхо олимпиадатыгар миэстэлэспитим. Биологияҕа кыайыылаах буолбутум. Араас тэрээһиннэргэ кыттан миэстэлэстим.
3. 2024 сылга барыта табылынна.
4. 2025 сылга үчүгэйдик матасыыкыл ыытарга үөрэниэхпин баҕарабын. Үөрэхпэр, успуорка өссө кыһаллыахпын баҕарабын.

Маша Солтуева, 7 кылаас:

1. Мин 2024 сылга саамай үөрүүлээх түгэним буолар — аймахтарбытын кытта бары биир күн мустан эһэбит 80 сааһын бэлиэтээбиппит. Алтынньы 28 күнүгэр оскуолабытыгар наһаа үчүгэй «Коммунарскай түмсүү» буолан ааспыта. Онно элбэх оҕону кытта билсэн доҕордоспутум.
2. 2024 сылга мин аҕыйах ситиһиилээхпин. Оройуоҥҥа олимпиадаҕа кыттан миэстэлэстим: саха тылыгар, саха литературатыгар, обществоҕа, олоҥхо олимпиадатыгар. Сэтинньи ыйга кинигэ ааҕан саҕалаатым.
3. 2024 сылга эһэм күн сириттэн баран элбэх былааннар сатамматылар.
4. 2025 сылга элбэх кинигэ ааҕыахпын баҕарабын. Үөрэхпэр өссө кыһаллан туйгун үөрэнээччи буолуохпун наада. Эзотерика, таро өттүнэн практикаланан элбэҕи билиэхпин баҕарабын. Чугас аймахтарбар чэгиэн доруобуйаны, элбэх харчыны уонна бары үчүгэйи баҕарабын!

Жанна Иванова, 7 кылаас:

1. 2024 сылга саамай үөрүүлээх түгэннэрим: төрөппүттэрбинээн киинэ көрүү, дьиэ кэргэммин кытары ас астааһын уо.д.а.
2. 2024 сылга оройуоннааҕы обществознание уонна астрономия олимпиадатыгар кыттыбытым. Обществознаниеҕа миэстэлэспэтэҕим, оттон астрономияҕа кыайыылаах буолбутум. Олус үөрбүтүм. Өссө уруһуй күрэҕэр кыттыбытым. Сорох күрэхтэргэ миэстэлэспэтэрбин да, миэхэ кыттыбытым да үчүгэй, элбэх билиини биэрэр.
3. Мин ааспыт сылга табыллыбатах түгэннэрим аҕыйахтар: дьүөгэлэрбин кытта сатаан күүлэйдээбэтим, куоракка күүлэйдии барбатым.
4. Мин 2025 сылга хомуска оонньуурга үөрэниэхпин баҕарабын, үөрэхпэр үчүгэй ситиһиилээх буолуохпун баҕарабын.

Лиана Павлова, 7 кылаас:

1. Мин 2024 сылга үөрүүлээх түгэннэрим суохтар, күн аайы биир курдук.
2. 2024 сылга мин хомуска оонньуурга үөрэнним.
3. Ааспыт сылга миэхэ үөрэҕим табыллыбата.
4. Мин үөрэхпэр ситиһиэхпин уонна дуоспуруннаах буолуохпун баҕарабын.

Ньургун Николаев, 7 кылаас:

1. Ааспыт 2024 сыл саамай үөрүүлээх, элбэх ситиһиилээх сыл. Сайыны быһа футбол оонньоотум, дьиэ кэргэнинэн баанньык туттубут. Сайын саҕаланыытыгар «Айар кут Голливуд» диэн лааҕырга сылдьыбытым, элбэх доҕордоммутум.
2. 2024 сылга элбэх ситиһиилэнним. Ахсынньы 20 күнүгэр «Барҕарыы» НПК-ҕа кыттан лауреат буолбутум, ахсынньы 14 күнүгэр Марха (Ньурба) улууһа 200 сылыгар аналлаах НПК-ҕа 1 истиэпэннээх дипломант буолбутум. Хомуска, гитараҕа, синтезаторга оонньуурга үөрэнним.
3. Ааспыт сылга барыта табылынна, наһаа былааннаабаппын.
4. 2025 сылга бэйэбэр өссө элбэх ситиһиилэри, үөрүүлээх түгэннэри баҕарабын.

Эвелина Васильева, 7 кылаас:

1. Ааспыт сылга мин саамай үөрүүлээх түгэннэрим: аймахтарбын кытта көрсүһүүлэр, муус устар 26 күнүгэр саҥа билсиһиилэр, олимпиадаларга сылдьан табаарыстарбын кытта көрсүһүү.
2. 2024 сылга мин ситиһиилэрим: оройуоннааҕы история олимпиадатыгар призер, «Барҕарыы» НПК-ҕа 1 истиэпэннээх дипломант буоллум, «Дьиэ кэргэн – биир сомоҕо» диэн оройуоннааҕы күрэххэ ийэбин, эбэбин кытта кыттан 2-с миэстэ буолбуппут.
3. Ааспыт сылга миэхэ волейболга үөһэнэн подачам кыайан табыллыбата.
4. 2025 сылга мин мас тардыһыытыгар үчүгэйдик дьарыктаныахпын, волейболга үөһэнэн подачаҕа үөрэниэхпин баҕарабын. Араас НПК-ларга кыттан саҥаны билиэхпин баҕарабын.

Эрик Федотов, 7 кылаас:

1. «Айар кут Голливуд» диэн лааҕырга сылдьыбытым, онно элбэх оҕо баар этэ.
2. Гитараҕа сорох нуоталары үөрэттим.
3. 2024 сыл иккис аҥарыгар биһиги сатаан үҥкүүлээбэтибит.
4. Гитараҕа үөрэниэхпин, Кытайга көтүөхпүн баҕарабын. Үчүгэйдик үөрэниэхпин баҕарабын. Хайыһарга күрэхтэһиигэ барыахпын баҕарабын.

Роман Татаринов, 7 кылаас:

1. 2024 сылга саамай үөрүүлээх түгэним атырдьах ыйыгар Бурятия сиригэр 21 күҥҥэ лааҕырга баран сынньаммытым буолар.
2. 2024 сылга мин ситиһиим диэн матасыыкыл ыытарга үөрэнним уонна өрөспүүбүлүкэтээҕи «Белый олененок» оҕо бэстибээлигэр хоһоон ааҕан кытынным. Арассыыйаҕа тиийэ кытта барар буоллум.
3. Ааспыт сылга миэхэ массыына ыытарга үөрэнэр табыллыбата.
4. 2025 сылга массыына ыытарга үөрэниэхпин баҕарабын.

Эдуард Николаев, 7 кылаас:

1. Ааспыт сылга мин үөрүүлээх түгэннэрим: тыраахтыр ыытыы, хотон тутуута.
2. «Ыллаа-туой, уол оҕо» күрэххэ кыттыбытым, английскай тыл олимпиадатыгар оройуоҥҥа 1 миэстэ буолбутум. Астрономия олимпиадатыгар кыттыыны ыллым.
3. Олимпиадалар, хонтуруолунай үлэлэр.
4. Алгебраны биллэхпинэ, үчүгэй үөрэнээччи буолуо этим.

Айгылаана Акимова, 7 кылаас:

1. Дьүөгэлэрбин кытта күүлэйдээбитим, Лиана, Юлиана, Жанна, Эвелина буолан. Соевай мясо сиэбиппит. Математиканы үчүгэйдик өйдүүр буолбуппун.
2. Сэтинньи 18 күнүгэр астрономия олимпиадатыгар кыттыбытым. Онно Жанналыын кыайыылаах буолан олус үчүгэй грамота туттубут. Уруһуйдуур буолбуппун. Бэйэбин өйдүүр буолбуппун.
3. Кинигэ атыылаһан баран, кыратык ааҕан иһэн ситэри аахпатым. Саҥаттан ааҕыахпын баҕарабын. Синтезатор баҕарабын да, сыаналаах. Атын тыллары үөрэтиэхпин баҕарабын. Английскайы үөрэтэ сатаабытым, кыратык өйдүүр буолбутум да, быраҕан кэбиспитим.
4. Дойдубун хаартыскаҕа түһэриэхпин баҕарабын. Canon 600 баҕарабын, ол гынан баран сыаналаах. Кырааскаланарга үөрэниэхпин баҕарабын.

Юлиана Иванова, 7 кылаас:

1. Сэтинньи 29 күнүгэр кыра оҕо төрөөбүтэ. Арчын диэн ааттаах. Эдьиийим Анита төрөөбүтэ. От ыйыттан «Tokio Hotel» диэн группаны билэн истэр буоллум.
2. Мин уруһуй тэтэрээтин оҥостубутум. Онно бырааттыы Каулицтары уруһуйдаабытым. Ахсынньы 22 күнүгэр волейбол күрэхтэһиитигэр кыттыбыппыт. Мас тардыһыытыгар киирбитим. 4. Мин немец тылын үөрэтиэхпин баҕарабын. Баттаҕым уһаатаҕына, кырыйыаҕым. 2025 сылга кинигэ эбэтэр ырыа суруйуохпун баҕарабын.

Рустам Николаев, 7 кылаас:

1. Мин балаҕан ыйыгар Ньурба улууһун аатыттан «Первенство РС (Я) по мас-рестлингу» кыттан 2 миэстэ буолбутум уонна Россияҕа кыттар путевка ылбытым. Ньурбаҕа сборга киирэн элбэх оҕону кытта билсибитим.
2. Ааспыт сылга элбэх күрэххэ сылдьыбытым. “Таланты земли Олонхо” күрэххэ үҥкүүнэн кыттан 1 истиэпэннээх лауреат буолан путевка ылбыппыт. Уфа куоракка «Первенство РС (Я) по мас-рестлингу» кыттан кэллим. Ньурбаҕа регионнааҕы мас тардыһыытын күрэҕэр 2 миэстэ буоллум, «Открытие сезона» күрэххэ 1 миэстэ. Элбэх табаарыстанным.
3. Россияҕа баран хотторбутум, атахпын тыраамбалаабытым. Республикаҕа финалга киирэн хотторбутум, атахпын сыыһа ууран тардыһан олорон охсуллубутум. Матасыыкыл ылыныахтаах этим. Үөрэхпэр үчүгэй үөрэнээччи буолуохтаах этим.
4. 2025 сылга мин «Первенство РС (Я) по мас-рестлингу» баран бастыахпын баҕарабын уонна Россияҕа барарга путевка ылыахпын баҕарабын. Үөрэхпэр кыһаллан «хорошист» буолуохпун баҕарабын.

keskil14.ru