11-с уонна 9-с кылаастарга БКЭ уонна ОГЭ буолар күннэрин бигэргэттилэр. Бу туһунан «Парламентская газета» ссылкалаах «Саха» НКИК иһитиннэрэр.
«11-с кылаастарга биир кэлим эксээмэн 2022 сылга кулун тутар 21-тэн от ыйын 2 күнүгэр диэри ыытыллыаҕа. 9-с кылаастарга сүрүн судаарыстыбаннай эксээмэн — муус устар 21-тэн от ыйын 2 күнүгэр диэри буолуоҕа», — диэн иһитиннэриигэ этиллэр.
Кулун тутар 21-тэн от ыйын 2 күнүгэр диэри биир кэлим судаарыстыбаннай эксээмэни эрдэ туттарааччылар суруйаллара бэлиэтэнэр. Итиэннэ ыалдьан уонна убаастанар биричиинэнэн БКЭ-ни кэмигэр туттарбатахтарга муус устар 11-тэн 18 күнүгэр диэри резервэ күннэрэ көрүллэр.
БКЭ-ни туттарыы сүрүн уонна резервэ күннэрин ааҕан ыам ыйын 26-тан от ыйын 2-гэр диэри буолуоҕа. Балаҕан ыйын саҕаланыыта эксээмэни туттарыыга эбии күннэр көрүллүөхтэрэ.
Эксээмэннэр бары сарсыарда 10:00 чаастан саҕаланыахтара. Математика (профильнай таһым), физика, литература, информатика уонна биология бирэдимиэттэригэр 3 чаас 55 мүнүүтэ бэриллиэҕэ. Нуучча тылыгар, химияҕа, естествознаниеҕа — 3 чаас 30 мүнүүтэ. Омук тылларыгар (английскай, французскай, немецкэй, испанскай) — 3 чаас 10 мүнүүтэ. Математикаҕа (базовай таһым), историяҕа, географияҕа, кытай тылыгар — 3 чаас. Омук тылларыгар «Саҥарыы» чааһыгар — 17 мүнүүтэ, кытай тылыгар бу чааска — 14 мүнүүтэ.
9-с кылаастарга сүрүн судаарыстыбаннай эксээмэни эрдэ туттарыы уонна резервэ күннэрин ааҕан муус устар 21-тэн ыам ыйын 17-гэр диэри уһуоҕа, оттон сүрүн — ыам ыйын 20-тэн от ыйын 2 күннэригэр. Итиэннэ балаҕан ыйын 5-тэн 24-гэр диэри эбии күннэри былааннаатылар.
ОГЭ бары бирэдимиэттэргэ 10:00 чаастан саҕаланыаҕа. Математикаҕа, нуучча тылыгар уонна литературатыгар 3 чаас 55 мүнүүтэ көрүллүөҕэ. Физикаҕа, обществознаниеҕа, историяҕа, биологияҕа, химияҕа — 3 чаас. Информатикаҕа уонна географияҕа — 2 чаас 30 мүнүүтэ. Омук тылларыгар — 2 чаас. Омук тылларыгар «Саҥарыы» чааһыгар — 15 мүнүүтэ.