Өрөспүүбүлүкэ дьаһалтата үөрэх хаачыстыбатынан Россия 15 бастыҥ регионун ахсааныгар киирэр санаалаах, онон СӨ үөрэҕин уонна наукатын министиэристибэтэ анал бырагырааманы 2021 сыл бүтүөҕэр диэри бэлэм оҥоруоҕа. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Билиҥҥи туругунан, үөрэх хаачыстыбатын көрдөрүүтүнэн Саха сирэ Рособрнадзор рейтинигэр 49-с миэстэҕэ турар. Ол туһунан үөрэх эйгэтин үлэһиттэрин Атырдьах ыйынааҕы сүбэ мунньаҕар Ил Дархан Айсен Николаев итэҕэстэри туоратарга соруйда.
«Өрөспүүбүлүкэ сорох оскуолалара дойду бастыҥнарын ахсааннарыгар, оттон атын оскуолалар тирэх билиини кыайан биэрбэт буолар балаһыанньалара уларыйыан наада», — диэн Айсен Николаев чопчулаан эттэ.
Ол эрэн 2021 сылга БКЭ-ни туттарыы түмүгүнэн, үрдүк бааллаах үөрэнээччи ахсаана элбээтэ: 29 оскуоланы бүтэрээччи үрдүк көрдөрүүлээх, оттон Нерюнгри 1-кы №-дээх оскуолатын үөрэнээччитэ икки бирэдимиэккэ сүүстүү баалы ылла, биологияҕа өрөспүүбүлүкэ үрдүнэн кини 100 баалга туттарда. Маны таһынан Саха сирин 20 оскуолата Уһук Илин бастыҥ оскуолаларынан ааттаннылар.
Ол курдук, СӨ үөрэҕин уонна наукатын министиэристибэтэ, анал тэрээһиннэрдээх уонна сайдыыны сыаналыыр чопчу бэлиэлэрдээх докумуону оҥоруоҕа. Ону тэҥэ, тустаах министиэристибэлэр судаарыстыбаннай тургутуу түмүгүн тупсарыыга былаан оҥоруохтара.
