2020 сыл “The Last of The II” уонна “Cyberpunк 2077” курдук күүстээх, кыахтаах, “топовай” оонньуулары бэлэхтээбитэ. Ол гынан баран аны саҥа оонньуулары көрөр кэм кэллэ. 2021 сыл биһиэхэ тугу бэлэмниирий? Саамай күүтүүлээх оонньуулартан 4 сүрүнү талан Павел Ильин билсиһиннэрэр.
Deathloop
Оҥорооччута: Arkane Studios
Таһаарааччыта: Bethesda Softworks
Платформалар: PC, PS5
Тахсар чыыһылата: Ыам ыйын 21 күнүгэр 2021 с.
Бу олус үчүгэй саҥа шутер. “Dishonored” диэн хампаанньа оонньууну харантыынтан сылтаан тахсыахтаах кэмиттэн көһөрбүтэ. Ол иһин “Arkane Studios” оонньууну тупсарыыга, туох баар сыыһатын көннөрөргө эбии бириэмэ көһүннэ.
Сүрүн дьоруой Кольт, оонньуу ис хоһоонунан, “сабыллыбыт» арыыга бэчэриинкэҕэ хас да киһини олохтон туоратыахтаах. Оччоҕо биирдэ быстах хаайтарыыттан босхолонор. Кини ол кистэлэҥ байыаннай эксперимент түбэһэн эрэйдэнэр. Аны туран, олохтоохтор уонна биир эмиэ наймыга үлэлээччи Джулиана буолан, Кольту утары киирсэллэр.
Кольту элбэхтэ өлөрөллөр даҕаны, кини төттөрү тиллэн кэлэ турар. Атыҥ дьоруойдартан уратыта диэн өлүөн иннинэ туох буолбутун барытын өйдүүр. Онон оонньуу хардыытынан, хас биирдии кэрдииһинэн Кольт арыы кистэлэҥин, олохтоохторун билэн босхолонор.
eFootball PES 2022
Оҥорооччута: Konami, Konami Digital Entertainment
Таһаарааччыта: Konami, PES Productions, Konami Digital Entertainment
Платформалар: PC, PS4, XBOX One, PS5, XBOX Series S
Тахсар кэмэ: 2021 с. күһүн
Интэриниэт ситимигэр “eFootball PES 2022” футбол оонньуута быйыл Unreal Engine 5 саҥа движокка көһөр. Ол аата графиката, физиката уларыйарын, футболистар тас көрүҥнэрэ тупсарын, хамсаныылара дьиҥнээххэ майгынныыр буоларын күүтэбит. 2021 сыллааҕы чааһа харантыын мэһэйдээн, кыра саҥардыылаах этэ (Season Update). Хамаандалар састааптара уонна таҥастара эрэ уларытар. Графика өттүгэр туох да уларыйыыны киллэрбэт. Ол иһин оонньууну оҥорооччулар 2022 сылга бука барытын саҥардарга былаан туруоруммуттара. Онон үөрэ-көтө саҥа чааһы күүтэбит.
Билигин бары FIFA футбольнай симуляторы оонньууллар. Тоҕо диэтэххэ, “eFootball PES 2022” Аангылыйа, Испания лигата лицензията суох (таҥастара суох, хамаанда аата, бэлиэтэ сымыйа). Оттон ниэмэс лигатын бу оонньууга олох да киллэрбэттэр. Ол иһин “Челси” (ФК Лондон), “Манчестер Сити” (Мэн Блу), “Ливерпуль” (Мерсисайд Ред), “Милан” (Милано РН), “Интер” (Ломбардия) аан дойдуга бастыҥ хамаандалар ааттара итинник. Истэргэ, ааҕарга көрөргө да, күлүүлээх. Ол да буоллар, “eFootball PES 2022” Россия футболун лигата баар. Онон дойдубут спордун сэҥээрээччитигэр сөптөөх оонньуу. Холобур, бэйэм сөбүлүүр ЦСКА кулуубу талан оонньуубун.
Horizon Zero Dawn
Оҥорооччута: Guerrilla Games
Таһаарааччыта: Sony Interactive Entertainment
Платформалар: PS4, PS5
Тахсар кэмэ: 2021 с. күһүн
Horizon Zero Dawn — 2017 сыл бастыҥ оонньуулартан биирдэстэрэ. Улахан аһаҕас эйгэ, сырдык, научнай фантастика уонна этно буккуспут дизайннаах. Сүрүн дьоруой Элой кыраһаабысса кыыс абааһылары кытта киирсиилэрин сюжета ойуулуур. Геймлейыгар туох эмэ саҥаны оҥорооччулар биллэрэ иликтэр, ол оннугар оонньуу эйгэтэ өссө кэҥээн, сайдан иһиэ диэн эрэннэрдилэр. Дьикти, ыраах сирдэргэ оонньуу дьоруойа саҥа таабырыннары, ханна да көстүбэтэх мамоннар уонна дьикти биис уустара күүтэллэр.
Resident Evil Village
Оҥорооччута: Capcom
Таһаарааччыта: Capcom
Платформалар: PS5, Xbox Series, PC
Тахсар кэмэ: 2021 с.
“Capcom” хампаанньа оонньуу аатыгар нүөмэрдэрин киитэрэйдик кистээн, былыргы вирустар, мутаннар уонна корпорациялар туһунан историяны саҥалыы туруорар. Resident Evil Village сюжетыгар ааспыт чаас дьоруойа Итан Уинтерс Европа сүрдээх кутталлаах дэриэбинэтигэр кэлэр. Бу сир олус үгүс кистэлэҥнээх, таабырыннаах. Уулуссаҕа абааһы бөҕөтө. Киһи ол дэриэбинэ олохтоохторун көрөн, олус эйэҕэс майгылаахтар диэбэт көрүҥнээхтэр.
Оҥорооччулар этэллэринэн, дэриэбинэ бэйэтэ оонньуу биир сүрүн геройунан буолуоҕа. Биэтэккэ диэри тиийэргэ кини сокуоннарын, кистэлэҥнэрин, кистэммит сирдэрин, бултаабыт сирдэрин барытын чинчийиэххэ наада. Аны оонньууга мультиплеер киирэр. Ол аата күрэхтэһиини таптааччыларга уонна хамаанданан оонньууга үчүгэй буолуон сөп.