Марафон
Марианна Константиновна ИОНОВА, “Ориентир” пост салайааччыта (Бүлүү 1 №-дээх оскуолата):
– Оскуолабыт оҕолоро кулун тутар ыйтан саҕалаан “Үтүө дьыала марафона” тэрээһиҥҥэ кыттан, инбэлииттэргэ уонна бэтэрээннэргэ көмө оҥоро сылдьаллар.
Хаартыскаҕа: социальнай педагог Мария Васильевна Федорова салалтатынан IX кылаас оҕолоро: Леня Спиридонов, Мир Николаев, Миша Макаров, Ньургустаана Мухоплева, Эдуард Мальцев, Настя Петрова, Сааскылаана Егорова, Егор Петров, Валентин Федотов, Нелли Куланова, Эрхан Павлов, Женя Гоголев үлэлии- хамсыы сылдьаллар.
Саһаан туруордулар
София Ивановна ПРОКОПЬЕВА, “Дьөппөн кэнчээрилэрэ” пост салайааччыта (Дьөппөн, Хаҥалас):
– Онус кылаастар үлэ бэтэрээнэ Ольга Афанасьевна Тимофееваҕа баран көмөлөстүлэр, саһаан туруордулар.
Хаартыскаларга: Катя Павлова, Радик Скрябин.
Көмө оҥордулар
З.Н. СТРУЧКОВА, “Бараховец” пост салайааччыта (Үөһээ Бүлүү 1 №-дээх оскуолата):
– VIII-IX кылаас оҕолоро педагогическай үлэ бэтэрээнэ Татьяна Васильевна Ченоховаҕа уонна Таисия Николаевна Семеноваҕа тимурдуу көмөнү оҥордулар.
Олбуору ыраастаатылар
Таисия Ивановна ИВАНОВА, “Ньургуһун” пост салайааччыта (Күндээдэ, Ньурба):
– Орто сүһүөх кылаас үөрэнээччилэрэ “Үтүө дьыала” аахсыйаны ыытан, бэтэрээн учууталлар Петр Кириллович Григорьевка уонна Ирина Ивановна Иудинаҕа олбуордарын ыраастаатылар, хаардарын тастылар. VIII кылаас салайааччыта – Ю.А. Максимова, IX – Е.А. Колтунова.
А.И. Замятина салайааччылаах VI кылаастар Людмила Никитична Михайловаҕа саһаан туруордулар.
Үтүө санаа нэдиэлэтэ
Айыы Куо СОЛОВЬЕВА, “Сайдыс” пост салайааччыта (Арбын, Нам):
– Арбын орто оскуолатын оҕолоро үтүө санаа нэдиэлэтин чэрчитинэн араас үлэни, тэрээһини ыыттылар.
Саас буолан, кир-хох тахсан, бырааттара, балыстара оонньуур оҕо былаһааккатын ыраастаатылар. Аны кырачааннарбыт ыраас сиргэ оонньуохтара-көрүлүөхтэрэ.
Экология аахсыйатыгар оҕолор төрөппүттэрин кытта чыычаах уйатын кыһаллан оҥорон, мастарга ыйаатылар. Бу уйаларга элбэх чыычаах төрүө-үөскүө, күн аайы чобуо ырыатынан, кэрэ көстүүтүнэн үөрдэ туруо, үүнээйилэрбитин үөннэртэн көмүскүө.
Төрөөбүт дэриэбинэбит олохтоохторугар үтүө санааларын анаан, өссө биир ураты аахсыйаны ыыттылар. Уулуссаҕа көрсүбүт дьонноругар үтүө тыллардаах аккырыыккалары бэлэхтээтилэр, дьон санаатын көтөхтүлэр.
Мас хайытан
Анна Петровна БОППОСОВА, Таатта улууһун Уолба оскуолатын эдкорпоһун салайааччыта:
– Оҕолорбут сылын аайы кырдьаҕастарга, кыамматтарга көмөлөһөллөр. Уолаттар мас хайыталлар. Кыра кылаастар ону саһаанныыллар.
Быйыл оҕолор икки биригээдэнэн мас хайыттылар. Салайааччыларынан эдэр учууталлар Владимир Григорьевич Кусатов, Иван Николаевич Беляев сырыттылар.
Үлэттэн толлубат
Быйыл саас тибии тибэн, сатыы киһи сылдьарыгар мэһэйдээх буолла. Биһиги бэтэрээн учууталбытыгар Раиса Федоровна Александроваҕа көмөлөһөн, тиэргэнин хаарын күрдьэн, киирэр-тахсар ыллыгын ыраастаатыбыт.
Кылааспыт салайааччыта Надежда Дмитрьевна Семёнова үлэҕэ-үөрэххэ көхтөөх, дьоҥҥо-сэргэҕэ үтүө сыһыаннаах буоларга үөрэтэр. Үлэттэн толлубат хоһуун дьон буола улаатыахпыт.
VII кылаас оҕолоро.
Чинэкэ, Бүлүү.