Хаҥалас улууһун М.Е. Васильева аатынан 2 Малдьаҕар орто оскуолатын музейыгар ыалдьыттаатыбыт. Музей салайааччыта Васильева Марина Николаевна кэпсииринэн, 1960-с сыллартан оскуола иһинэн музей хамсааһына саҕаланан, экспонаттары хомуйуу тэриллибит.
Ол кэмҥэ оскуола учууталлара бу үлэҕэ көхтөөх кыттыыны ылбыттар. Нэһилиэктэн элбэх матырыйаал хомуллан барбыт. Ол гынан баран, Марина Николаевна этэринэн, күн бүгүн ол матырыйааллартан оскуола музейыгар аҕыйах экспонат тиксибит. «Матырыйаал үксэ «Дьөһөгөй оҕото» нэһилиэк музейыгар бэриллибитэ. Оскуола музейа 2019 сылтан Россия музейдарын реестригэр киирдэ. Экспонаттарбыт барыта ааҕыллан, оскуола историятын кэрэһэлиир музей сыллата баай матырыйаалланан иһиэ диэн эрэнэбин», – диир кини.
Биһиги оскуолабыт 2018 сылтан өр сылларга үлэлээбит учуутал, дириэктэр Матрена Егоровна Васильева аатын сүгэр, ол иһин киниэхэ анаан элбэх матырыйаал хомуллубут. Кини саамай улахан үтүөтэ диэн үүнээйи олордуутун Улахан Аан нэһилиэгэр бастакынан киллэрбит. Сайын аайы оҕолор оскуола учаастагар кэлэн үлэлииллэрин тэрийбит.
Музейбыт саамай элбэх ахсааннаах экспонаттарынан кылаас альбомнара буолаллар. Марина Николаевна кэпсииринэн, 300-чэкэ альбом баар. Хас биирдии кылаас сыл устата туох ситиһиилэммитин, хайдах үөрэммиттэрин, оҕолор ахтыыларын, хаартыскаларын бу альбомнартан булуохха сөп. Билигин оҕолор эмиэ альбом оҥорон, сыл аайы оскуолаҕа бэлэхтииллэр.
«Өссө биир сыаналаах экспонатынан буолар биһиги нэһилиэкпититтэн Аҕа дойду сэриитигэр кыттан кэлбит аатырбыт танкист Николай Прокопьевич Егоров ахтыыларынан «Бөртөлөргө, дойдум дьонугар» диэн кинигэ, – кэпсиир музей салайааччыта. – Кини икки атаҕын танкаттан тахсан иһэн, снарядка тоҕу тэптэрэн бааһырар, ити сылдьан билиэҥҥэ түбэһэр, онтон эрэйдээхтик куотар. Иккистээн билиэҥҥэ түбэһэр, онтон биһиэннэрэ түбэһэ кэлэннэр, тыыннаах хаалар. Кини күүстээх санаалаах буолан, дойдутугар ытык иэһин төлөөбүт биһиги киэн туттар биир дойдулаахпытынан буолар».
Оскуолабыт музейыгар пионерскай муннук баар, сахалыы иһиттэр, выпускнитарбытыгар аналлаах стендэлэр, урукку кинигэлэр, музыкальнай инструменнар, онтон да атын экспонаттардаах. Малдьаҕар орто оскуолата олус интэриэһинэй музейдаахпыт.
Музей салайаачытын Васильева Марина Николаевнаны кытта интервьюну бу ссылканнан киирэн көр.
Богдан СЛЕПЦОВ, VII кылаас,
М.Е. Васильева аатынан 2 Малдьаҕар орто оскуолата, Хаҥалас