Балаҕан ыйын 19 күнүгэр Егор Кычкин аатынан Матта орто оскуолатын үөрэнээччилэрэ «Сохраним лес» бүтүн Арассыыйатааҕы акцияҕа кытынныбыт.
6-11 кылаас үөрэнээччилэрэ уонна оскуола үлэһиттэрэ оскуола учаастагар 15 маһы олортубут. Нэһилиэкпит олохтоохторо Наталья Гаврильевна Романова 6 долохонону, Октябрина Николаевна Брызгалова 1 долохонону, Татьяна Семеновна Кычкина 4 тэтиҥи, 4 хатыҥы оскуолабытыгар бэлэх ууннулар.
Быйыл Арассыыйа араас регионнарыгар 70 мөл. мас олордоллоро былааннанар. Тыа — планета тыҥата уонна биһиги дойдубут сүрүн баайа. Хомойуох иһин, ойуур мастара, ото-маһа иэдээннээх кэрдииттэн уонна киһи илиитэ алдьархайыттан эмсэҕэлиир. Биһиги тус бэйэбит кыахпытынан , күүспүтүнэн баай тыабыт, айылҕабыт ылбыт эчэйиитин көннөрөр, чөлүгэр түһэрэргэ көмөлөһөр тустаахпыт. Дойдубут айылҕатыгар эппиэтинэстээхтик, харыстабыллаахтык сыһыаннаһар дьон буола үүнэбит.
Матта оскуолатыгар үтүө үгэс баар. Сылын аайы үөрэнээччилэр мас олордуутугар кыттыыны ылаллар. Күөх тыабытын харыстыах тустаахпыт.
«КУОРСУН» медиацентр