XXII-с «Манчаары оонньууларыгар» төрүт оҕунан ытыыга Бүлүү кыраҕы харахтаах бэргэн ытааччыта 14 саастаах Данил Николаев ааттанна. Маны таһынан кини 22 очукуону ылан, уолаттарга маҥнайгы миэстэни ылары ситистэ уонна Саха Өрөспүүбүлүкэтин успуордун маастарын нуорматын толордо. Онон «Манчаары оонньууларын» устуоруйатыгар аан бастакытын маннык ураты чаҕылхай түгэни бэлэхтээтэ!
«Манчаары оонньууларыгар» уопсайа түөрт киһи СӨ успуордун маастарын толордо. Олор истэригэр Бүлүү улууһун Бөтүҥ орто оскуолатын 8 кылааһын үөрэнээччитэ Данил Николаев.
Төрүт оҕунан ытыы Бүлүү улууһугар саамай сайдыбыт успуорт көрүҥүнэн ааҕыллар. Аҥардас Бөтүҥ нэһилиэгин бэргэн ытааччылара бүтүн улуус чиэһин «Манчаары оонньууларыгар» көмүскүүллэр. Хамаанданан ытыыга бүлүүлэр 29 очукуону хомуйан, маҥнайгы миэстэни ыллылар, онон үөрүүлэрэ муҥура суох.
Клара Спиридонова, Бөтүҥ орто оскуолатын физкультура учуутала, муҥутуур кыайыылаах Данил Николаев тренерэ:
— Төрүт оҕунан ытыынан 2021 сыллаахтан дьону дьарыктыыбын. «Манчаары оонньууларыгар» кэлбит хамаанда барыта Бөтүҥ улууһуттан кэлбиттэрэ. Хамаанданан ытыыга кыайыыбыт төрдө — хамаанда бары, алта киһи, бииргэ үлэлээн кыайдыбыт. Бу биир эрэ киһи кыайыыта буолбатах, алта киһи ситиһиитэ. Алта киһи бары уһуктан, үлэлиэхтээх үлэлэрин чуолкайдык оҥордулар, сыалларын ситистилэр. Ол иһин кыайыы кэллэ! Бүлүүгэ төрүт оҕунан ытыы биир сайдан турар успуорт көрүҥүнэн буолар. Бэйэбит улууспут иһигэр төрүт оҕунан ытыыга федерациялаахпыт. Дьарык тиһэҕин быспакка күн аайы ыытыллар, онон таһым үчүгэй.
ХХll-с «Манчаары оонньууларыгар» төрүт оҕунан ытыыга Дьокуускай куорат бастакы миэстэни ылла, киниттэн икки эрэ очукуонан хаалан, Бүлүү хамаандата иккис миэстэҕэ таҕыста, үсүһү — Үөһээ Бүлүү хамаандата ылла.
Онтон төрүт күрэс көрүҥнэригэр XXII «Манчаары оонньуулара» оҕунан ытыыга муҥутуур кыайыылааҕа Данил Николаев анал бириис — мотоцикл хаһаайынынан буолла. Кыайыылаахха бирииһи СӨ инновацияҕа, цифровой сайдыыга уонна сырдатар коммуникационнай технологияларга миниистирэ, СӨ оҕунан ытыыга федерациятын бэрэсидьиэнэ Василий Ефимов чөмпүйүөннэри чиэстиир үөрүүлээх быһыыга туттарда.
Матырыйаалы оҥордулар
Авдей НЕУСТРОЕВ, Яна ГУЗАИРОВА, Снежана ЯКОВЛЕВА, Стас ПОПОВ.
«Кэскил» оҕо пресс-киинин эдкордара.
keskil14.ru