Саха сиригэр Баппаҕаайы нэhилиэгэ элбэх Герой ийэлээҕинэн биллэр. Ол курдук, нэһилиэкпит 13 ийэтигэр “Герой ийэ” диэн уордьаны туттарбыттара, албан ааты иҥэрбиттэрэ. Кинилэр кимнээхтэрий? Алексеева Елизавета Марковна, Алексеева Любовь Гаврильевна, Васильева Прасковья Алексеевна, Иванова Мария Кирилловна, Кириллина Христина Игнатьевна, Никифорова Варвара Петровна, Николаева Анна Капитоновна, Николаева Евдокия Игнатьевна, Николаева Евдокия Николаевна, Николаева Федора Спиридоновна, Федорова Екатерина Никитична, Федорова Мария Семеновна, Федорова Марфа Егоровна.
Герой ийэлэри чиэстээн, ааттарын үйэтитээри, нэһилиэк олохтоох дьаһалтатын көмөтүнэн Ийэ скверин дэриэбинэ ортотугар оҥордулар.
Өйдөбүнньүк буолар сквергэ Герой ийэлэр хаартыскалаах стендэлэрин, ол аттыгар хараҥаҕа дьэрэкээн уотунан оонньуур фонтаны (сайыҥҥы кэмҥэ холбонор), итиэннэ тохтоон сынньанан, сэһэргэһэ түһэргэ аналлаах кэрэ көстүүлээх ыскамыайкалары туруордулар.
Ийэ күнүгэр анаан Ийэ скверин үөрүүлээхтик арыйыыга нэһилиэк дьоно-сэргэтэ, Герой ийэлэр оҕолоро, сиэннэрэ кэлэн кытыннылар, ахтан-санаан аастылар, үөрүүлэрин үллэһиннилэр.
Билигин нэһилиэккэ 4 Герой ийэ баар, икки Бүлүүгэ уонна Дьокуускайга олорор. Бырааһынньыкка Федорова Марфа Егоровна, Николаева Евдокия, Николаева Федора кэлэн, кыһыл лиэнтэни быстылар, бар дьоҥҥо, эдэр ыччакка баҕа санааларын, алгыс тылларын эттилэр.
Ийэ баар буолан — олох баар. Махтанабыт ийэлэрбитигэр — күн сирин көрдөрбүттэригэр. Убаастыыр дьоммутугар бары үтүөнү, кытаанах доруобуйаны, дьоллоох уһун олоҕу баҕарабыт.
Людмила Тарасова,
“Көмүс бөрүө” пресс-киин салайааччыта.
Бүлүү, Илбэҥэ.