Бүгүн Харбалаахтааҕы үөрэхтээһин холбоһугар саха норуотун киэн туттар сээркээн сэһэнньитэ, норуодунай суруйааччы Н.Е.Мординов-Амма Аччыгыйа «Сааскы кэм» арамаанынан инсценировка көрүүтэ сүрдээх үчүгэйдик буолан ааста. Бу бэһис сылын ыытыллар тэрээһиҥҥэ кылаастар бары олус көхтөөхтүк айымньыттан урут көрдөрүллүбэтэх түгэннэри быһа тардан көрдөрдүлэр. Оҕолор ис сүрэхтэн оонньоотулар, оруолларын толору арыйдылар. Бу тэрээһини саха тылын учууталлара Валентина Семеновна Кривошапкина, Варвара Павловна Трофимова иилээн-саҕалаан хас сыл аайы ыыталлар. Оҕону ааҕыыга сыһыарыыга, сценическай культураҕа иитиигэ улахан оруоллаах, көмөлөөх тэрээһин буолар.
Түмүккэ,
Алын сүһүөхтэргэ:
3 кылаас-1 миэстэ
2 кылаас-2 миэстэ
4 кылаас-3 миэстэни ыллылар
Орто уонна улахан сүһүөхтэргэ:
7 кылаас-1 миэстэ
8 кылаас-2 миэстэ
5 кылаас-3 миэстэлэри үллэһиннилэр.
«Бастыҥ оруолу толорооччу» анал аат хаһаайыннарынан: Ванесса Федорова,1кылаас;Сайыына Шестакова,2 кылаас; Айсен Алексеев, 3кылаас; Диана Дьяконова,5кылаас;Айсаана Федорова,7 кылаас; Диана Слепцова,8 кылаас; Спиридонов Миша,10 кылаас үөрэнээччилэрэ бэлиэтэннилэр.
Биһиги бу «Сааскы кэм» айымньыны 5 сылы быһа сыанаҕа оонньуурбутугар арамааны аахтыбыт, төрөөбүт дойдубут урукку олоҕун, сирин-уотун билистибит.

Лейла Никонова, Н.Е. Мординов-АммаАччыгыйын аатынан Харбалаахтааҕы үөрэхтээһин холбоһугун 8 кылааһын үөрэнээччитэ.