Быйыл Үүнэр көлүөнэ тыйаатырын чаҕылхай сулуһа, Саха өрөспүүбүлүкэтин үтүөлээх артыыската Мария Никитична Данилова үбүлүөйүн бэлиэтиир. Кини тыйаатырга үгүс сүрүн оруоллары оонньуурун, уопсастыбаннай үлэни толорорун таһынан оҕолору кытта ыкса үлэлиир. Бүгүн «Мин баар буолуохтаах хаартыскам» испэктээк кэннэ биһиги кулиса кэннигэр тиийэн бэлиэ күнү көрсө Мария Никитичналыын кэпсэтэргэ соруннубут.
— Мария Никитична, оҕолор театральнай студияларын туһунан сиһилии кэпсиэҥ дуо? Хас саастарыттан эһиэхэ кэлиэхтэрин сөбүй?
— Биһиги театрбыт иһинэн икки оҕо студията үлэлиир, нууччалыы уонна сахалыы. Сахалыы студиябыт тэриллибитэ биир сыл буолла. «Үктэн» диэн ааттаах. Ол аата үктэнэҕин уонна үүнэр көлүөнэ тыйаатыра диэн өйдөбүллээх буолар. Манна оҕолор ба1-кы кылаастан 11-кэ диэри дьарыктаналлар. Сылдьыан баҕалаах оҕолорго кастинг ыыппыппыт, онтон сүүмэрдэммит оҕолору кытта дьарыктанабыт.
— Кастинг хайа эрэ биир кэмҥэ буолар дуо?
— Бу кастиммыт олунньу ыйга ананан икки күн ыытыллыбыта. Оттон ол кэннэ даҕаны сылдьыан баҕалаах оҕолор көһүннэхтэринэ анаан ыҥыран көрөбүт. Үксүлэрин ыла сатыыбыт, тоҕо диэтэххэ бу сахалыы тыллаах студия, оттон билиҥҥи оҕолор төрөөбүт тылларынан саҥаралларын ыарырҕатар буолбуттар. Биһиги сыалбыт – саха тылын, култууратын сайыннараары, маннык студияны тэрийбиппит. Оттон, уонна оҕо тыйаатырга сылдьан олус сайдар, тыйаатыр диэн киһиэхэ олус улахан, үгүс билиини биэрэр, култуураны иҥэрэр.
— Кэлэр оҕолор ураты талааннаах буолуохтаахтар дуо? Бу оҕо сатаан оонньууһу диэн хайдах таба тайааҕытый?
— Талааннаах оҕо тута көстөр. Оттон мин тус бэйэм оҕо барыта талааннаах дии саныыбын. Оҕону эрчийдэххэ, кини талаана хайаан да тахсан кэлэр. Ол иһин биһиэхэ кэлэр оҕо сүрүннээн сахалыы санаалаах, сахалыы саҥарар эрэ буолуон наада. Оҕо диэн пластилин курдук.
— Оҕолору кытта үлэлиир ыарахан дуо?
— Олох ыарахана суох. Олус чэпчэки, олус үчүгэй. Оҕо диэн бэйэтэ чэпчэки эйгэлээх, аһаҕас. Ол иһин оҕолору кытта киһи бэйэтэ оҕо курдук да буолан ылар
— Студия оҕолоро туох ситиһиилээхтэрий?
— «Үктэн» театральнай студия сылтан эрэ ордук кэмҥэ икки испэктээги туруорда. Маҥнайгы үлэбит Суорун Омоллоон айымньытынан «Көтөрдөр хоту көтөллөр» диэн испэктээги Прасковья Дмитриевна Павлова, тыйаатырбыт сүрүннүүр худуоһунньуга, култуура туйгуна туруорбута. Онно оҕолор бука бары оонньообуттара, олус үчүгэй премьера буолбута, көрөөччү бөҕө кэлбитэ. Оттон быйыл Саҥа дьылга «Таал-Таал эмээхсин» остуоруйаны туруордубут. Онно эмиэ оҕолор бары оруолга тиксэн оонньообуттара. Оҕолор олус сөбүлээн оонньууллар, «хаһан испэктээк көрдөрөбүт, хаһан сыанаҕа тахсабыт?» — дии сылдьаллар.
— Мин бэйэм да испэктээк көрөн олус астынным, бэйэм ооньуохпун баҕардым.
— Оттон кэлэн студияҕа дьарыктанаар, доҕотторгун да аҕалыаххын сөп. Бу билигин көрдөрбүт испэктээкпит «Мин баар буолуохтаах хаартыскам» диэн Виктор Астафьев айымньытынан тыйаатыр режиссера Антон Ботуков туруоруута. Москваҕа «Золотая маска» фестивальга бараары сылдьар. Бу испэктээк Саха сирин, дьон олоҕун-дьаһаҕын туһунан олус элбэҕи кэпсиир.
— Кэпсэтиибит иһин барҕа махтал! Үгүс ситиһиини баҕарабын!
Марианна Фёдорова, Дьокуускай куорат 7-с №-дээх осуолатын
8 кылааһын үөрэнээччитэ, «Кэскил» юнкора