Кулун тутар 18 күнүгэр биһиги, «Кэскил» юнкордара «Сосновый бор» лааҕыртан Бэчээт дьиэтигэр икки улахан оптуобуһунан айаннаан тиийбиппит. Наһаа үчүгэйдик үөрэ-көтө, ыллыы-туойа айаннаабыппыт.
Иккис этээскэ медиа кииҥҥэ киирэн олорбуппут. Сып-сырдык саала. Биһигини «Кэскил» оҕо бэчээтин кыһатын дириэктэрэ Ольга Ивановна Семенова көрсүбүтэ. Дьэ онтон Саха Өрөспүүбүлүкэтин инновацияҕа, цифровой сайдыы уонна инфокоммуникационнай технологияларга миниистирэ Василий Васильевич Ефимов кэлбитэ.
Кини медиа эйгэ туһунан бэйэтин санаатын эппитэ. Юнкор буолар диэн дьон иннигэр эппиэтинэстээх буолуу туһунан кэпсээбитэ. Мин бу көрсүһүүгэ креативнай экономика туһунан биллим. Ол аата Саха сирэ бэйэтин уратытын, туохха талааннааҕын көрдөрөн, кэпсээн улахан таһымҥа тахсарын ситиһии диэн өйдөөтүм.
Василий Васильевич бэйэтэ оскуолаҕа үөрэнэ сылдьан суруналыыстыканы сөбүлүүр, бэйэтигэр чугастык ылынар эбит. Онтон билигин медиа хайысханы өрөспүүбүлүкэҕэ салайан илдьэ сылдьар миниистир буолбут.
– Киһи билиини учебниктан эрэ ылбат. Киһи тулалыыр эйгэттэн, дьону кытта кэпсэтэн, бэйэтин толкуйун сайыннаран, элбэх кинигэни ааҕан олоххо билиитин-көрүүтүн сайыннарар, – диэн эттэ миниистир Василий Васильевич Ефимов.
Салгыы биһигини кытта «Сахабэчээт» медиа тэрилтэтин үлэһитэ Зинаида Михайловна Григорьева уонна режиссер Александр Лукин көрүстэ. «Сахабэчээт» тэрилтэтэ улуустарга бэчээттэнэн тахсар хаһыаттары кытта үлэлиир эбит.
Ону таһынан кинилэр Тимофей Сметанин уонна Яков Стручков «Мэхээлэчээн булчут кэпсээннэрэ» диэн айымньыларынан киинэ уста сылдьаллар. Ол туһунан кэпсээтилэр уонна «Мэхээлэчээн булчут кэпсээннэрин ааҕан» киинэни көрөргө бэлэм буоларбытыгар сүбэлээтилэр.
Күндүүнэ ЕГОРОВА, VII кылаас,
М.Н. Готовцев аатынан Танда орто оскуолата, Уус Алдан
Родион Перевалов хаартыскалара, VIII кылаас,
Лөгөй лиссиэй-интэринээт, Уус Алдан