Бу сыл олунньу 21 күнүгэр Чурапчы нэһилиэгин «Радость» оҕо дьоҕурун сайыннарар киин дьиэтигэр оскуола үөрэнээччилэригэр «Медиа будущее: расскажи о будущем» диэн сүрдээх интэриэһинэй форум буолан ааста. Тэрээһин сыала: медиа хайысхатыгар оҕолору сыһыарыы, оҕолор дьоҕурдарын арыйыы, эрдэ алтыспатах киһитин кытары биир тыл булан хамаанданан үлэлээһиннэрэ.
Бу тэрээһиҥҥэ Чурапчы улууһун түөрт оскуолатын медиа кэккэтинэн үлэлэһэр үөрэнээччилэр кэлэн кыттыыны ыллылар. Бастатан туран хамаандаларга арахсыбыппыт, онтон ыҥырыылаах ыалдьыттарбыт Самсон Гаврильевич, Марфа Васильевна, Саргылана Гаврильевна олус сонун мастер-кылаастары көрдөрбүттэрэ. Ол кэннэ үс хамаандаҕа арахсан «Дойдуhа» диэн тиэмэҕэ кылгас reels видео-ролик оҥорбуппут, барытын бэйэбит толкуйдаан, оҥорон таһаарарбыт олус астык этэ. Бары түргэн-түргэнник ылсаммыт, ким туохха эппиэтинэстээҕин үллэстэммит, сүүрэн-көтөн сыалбытын ситиспиппит. Иккис чааһыгар хас биирдии хамаанда видеоларбытын көмүскээбиппит. Оҕолор дойдуhа диэн тылы хайдах өйдүүллэрин, туох санаалаахтарын истэр, көрөр сүрдээх долгутуулаах этэ.
Дьүүллүүр сүбэ түмүк таһаарар кэмигэр кылгас backstage диэн видеолары оҥорон көрдүбүт, ким хайдах үлэлээбитин, хайдах курдук кыһаллыбыттарын көрөр олус үчүгэй. Түмүгэр бары хамаанданан наҕараадаланан, сертификат тутаммыт үөрэ-көтө тарҕаспыппыт.
Билиҥҥи кэмҥэ эдэр ыччакка дьоҕурдарын сайыннарар кыах баара наһаа да астык. Бу форумтан элбэҕи биллибит, көрдүбүт. Сүрдээҕин диэн дуоһуйдубут, саҥаны айарга-тутарга кынаттанныбыт. Улахан махталбын тиэрдэбин салайааччыларга, тэрийээччилэргэ!
Сиһилии видео көр:
Макарова Арианна,
С.А.Новгородов аатынан Чурапчы орто оскуолатын
10 кылааһын үөрэнээччитэ