“Азия оҕолоро” спортивнай оонньуулар төрдүс күннэрэ саҕаланна. Үс күн түмүгүнэн мэтээлэ элбэҕинэн Соҕуруу Корея бастаан иһэр. Биһиги биир да миэстэлэһиибит суох.
Хоккеистарбытыгар эрэ эрэнэбит. Кинилэр В бөлөххө бастакы күөҥҥэ сылдьаллар. 17:2 очукуонан туркменнары кыайбыттара. Аны бүгүн ураллары кытта көрсөллөр. Онон ситиһиини баҕарыаҕыҥ.
Сноубордистарбыт туораабыттара. Шорт-треккэ (1500 м) Алина Фомченко финалга киирэн баран хоттордо. Хайыһарынан 5 уонна 10 км сүүрүүгэ эмиэ мэлийдибит. Арыый үчүгэй көрдөрүүбүт — Елизавета Клуген 62 киһиттэн 31-с кэлбитэ буолар. Уолаттарга Илья Заваротнюк 12-с буолла.
Бачча хаардаах дойду ыччата итии дойдулар оҕолоругар хоттороллоро кыбыстыылаах соҕус. Мантан ыла кыһыҥҥы спортивнай көрүҥнэргэ күүскэ дьарыктыахтарын наада эбит. Онуоха хаҥкылыырга, хайыһардыырга аналлаах элбэх объект тутуллара ирдэниллэр.
Оттон кэлэр Оонньуулар Кемеровскай уобаласка ыытыллара быһаарылынна. 2021 дуу, 2023 дуу сылга. Онуоха диэри үчүгэйдик бэлэмнэниэх тустаахпыт. Бэйэбит олохтообут, саҕалаабыт “Азия оҕолорбутугар” ситиһиилээхтик кыттар туһуттан.