Балаҕан ыйын 15 күнүттэн 24-гэр диэри Дьокуускай куорат киһи саамай сылдьар сиригэр Крестьянскай ырыынагын кэккэлэһэ Комсомольскай болуоссакка үгэскэ кубулуйбут күһүҥҥү өрөспүүбүлүкэтээҕи ас-үөл быыстапка-дьаарбаҥката ыытылла турар. Быйылгы дьаарбаҥкаҕа өрөспүүбүлүкэ агро хайысхалаах оскуолалара 10 күн устата бэйэлэрин үлэлэрин билиһиннэрэ, уопуттарын көрдөрө-атастаһа, маны тэҥэ оҥорон таһаарар бородууксуйаларын атыылыы кэлэн тураллар.
Бүгүн Саха сирин агропромышленноһын сайдыытыгар улахан кылааты киллэрэр Мэҥэ-Хаҥаластан Ороссолуода, Хорообут нэһилиэктэрин, Уус Алдантан Танда, Хаҥаластан 2-Малдьаҕар нэһилиэктэрин уонна Дьокуускай куораттан Хатас агро хайысхалаах оскуолаларын кытары көрсөн кэпсэттибит.
Холобур, Ороссолуода агротехнологическай оскуолатын үөрэнээччилэрэ бэйэлэрэ үүннэрэр оҕуруот астарыттан хатарыллыбыт бэлэм борщ миин, хортуоскаттан хачыгырыы сылдьар чипсы, араас отонтон барыанньаларын, минньигэс пастилаларын, оннооҕор сылгы сыатыттан мыыланы оҥороллорун кэпсээн сөхтөрдүлэр.
Онтон П.Н. уонна Н.Е. Самсоновтар ааттарын сүгэр Хатас орто оскуолата өрөспүүбүлүкэҕэ биир бастыҥ үлэлээх агротехнологическай хайысхалаах оскуолалар ахсааннарыгар киирэр. Былырыын Москва куоракка XXIV Бүтүн Арассыыйатааҕы тыа хаһаайыстыбатын «Көмүс күһүн-2022» быыстапкатыгар Хатас агробизнес оскуолата икки кыһыл көмүс уонна биир боруонса мэтээллэринэн наҕараадаланан турар.
Быйыл даҕаны хаалсыбатылар, өрөспүүбүлүкэҕэ 115 киилэлээх тыкваны олордон, рекорд олохтоотулар! Аны бэйэлэрэ оҥорон таһаарар бородууксуйаларын: “Уха из якутского карася” пакетированнай түргэн аһы 7000 устууканы, “Тушеная жеребятина” кэнсиэрбэлэммит эти 3000 устууканы анал байыаннай дьайыы байыастарыгар ыытан тураллар.
Сиһилии бүгүҥҥү дьаарбаҥка-быыстапка туһунан видеорепортажка көрүҥ уонна «лайк» туруораргытын умнумаҥ.
keskil14.ru