Муус устар 13 күнүгэр биһиги нэһилиэкпитигэр тустуу үөрүүлээх түгэнэ буолан ааста. Бу күн биһиги биир дойдулаахпыт, Н.С. Захаров-Сахаачча аатынан Амматааҕы оҕо спортивнай оскуолатын тренерэ, ССРС спордун маастарыгар кандидат, Саха өрөспүүбүлүкэтин үөрэҕириитин туйгуна Илья Анатольевич Солдатов сырдык кэриэһигэр аналлаах оҕолорго улуустааҕы тустуу турнира буолан ааста. Манна 2008-2009, 2010-2011, 2012-2013, 2014-2015 сыллаах төрүөх уолаттар барыта 15 ыйааһыҥҥа күрэхтэстилэр https://vk.com/clip-199463452_456241309?c=1
Турнир биир бэлиэ түгэнинэн Эмис спорт саалатыгар Илья Анатольевич Солдатов аатын иҥэрдилэр, ол туһунан туоһулуур гранитнай таблицаны үөрүүлээх быһыыга-майгыга арыйдылар.
Биһиги нэһилиэкпит ытыктанар олохтооҕо, 40-ча сыл Эмис оскуолатыгар үлэлээбит ветеран учуутал Анатолий Алексеевич Михайлов алгыс тылын этэн, аал уотун аһатта. Нэһилиэк кырдьаҕастарын түмсүүтэ кэлбит ыалдьыттары алаадьынан күндүлээтилэр.
Бу үөрүүлээх түгэҥҥэ Амма улууһун баһылыга Степан Николаевич Кузьмин кыттыыны ылла.
– Эмис нэһилиэгэр спорт саала Илья Анатольевич Солдатов аата иҥэриллибитинэн Амма улууһун дьаһалтатын уонна тус бэйэм ааппыттан итиитик-истиҥник эҕэрдэлиибин. Илья Анатольевич Амма улууһун спорда, көҥүл тустуу бүтүн дойдубут спорда сайдарыгар улахан кылаатын киллэрбит киһи буолар диэн биһиги үрдүктүк сыаналыыбыт. Кини үөрэнээччилэрэ улууспут, өрөспүүбүлүкэбит аатын ааттата туралларыттан, чиэстээхтик көмүскүүллэриттэн олуһун диэн үөрэбит. Ол курдук Аммабыт биллэр тустууктара Герман Устинов, Владимир Егоров, Георгий Окороков Илья Анатольевич илиитин иһинэн ааспыт тустууктар буолаллар. Нэһилиэк баһылыгын Прокопий Петрович Бубякинныын сүбэлэһэн, кэпсэтэн баран, Илья Анатольевич аатынан спорт саала өрөмүөнүгэр эһиилги сылга Амма улууһун бюджетыттан үп-харчы көрүөхпүт, – диэн эппитин олохтоохтор ытыс тыаһынан ылынныбыт.
Илья Анатольевич кэргэнэ Мария Тарасовна, уола Өркөн Солдатовтар, кыыһа Александра Левина Эмис олохтоохторо аҕаларын аатын үрдүктүк туталларыгар махтаннылар уонна саҥа көлүөнэ ыччаттар Илья Анатольевич аатын чиэстээхтик, соргулаахтык сүгэллэригэр баҕа санааларын эттилэр. Эмис нэһилиэгин баһылыга Прокопий Петрович Бубякин спорт саала дириэктэригэр Валентин Павлович Николаевка спорт саалаҕа И.А. Солдатов аатын иҥэрии туһунан нэһилиэк депутаттарын 2024 с. кулун тутар 25 күнүнээҕи 6 №-дээх быһаарыныыларын үөрүүлээх быһыыга-майгыга туттарда.
Биһиги, оҕолор, мантан инньэ Эмискэ спорт саалаҕа киирэрбитигэр Илья Анатольевич сырдык мөссүөнүн наар көрө, биһиги нэһилиэкпитигэр бастыҥ үлэлээх тустуу тренерэ олорон ааспыта диэн өрүү саныы сылдьыахпыт.
***
Салгыы спорт саалаҕа тустуу турнирын үөрүүлээхтик арыйыы буолла. Турнирга Эмис https://keskil14.ru/strong-dojdubut-aatyn-k-hs-b-t-ger-s-ge-syldan-k-m-sk-hp-t-strong/ Н.С. Захаров-Сахаачча аатынан Амматааҕы оҕо спортивнай оскуолатын, Алтан, Сатаҕай, Бөтүҥ, Сулҕаччы хамаандалара, барыта 80-ча тустуук оҕо кыттыыны ылла.
Турнир үөрүүлээх арыллыытыгар Илья Анатольевич тренерэ Руслан Семенович Попов кэргэнин Таисия Моисеевнаны, Эмис нэһилиэгэр үөрэппит учуутала Иосиф Васильевич Петров, Олом Күөлтэн бииргэ үлэлээбит ытыктыыр кырдьаҕаһа Николай Егорович Кузьмин, тустуу көбүөрүгэр бииргэ үлэлээбит тренердэрэ, чугас доҕотторо, эрчийбит таһаарбыт уолаттара кыттыыны ыллылар.
Бу күн И.А. Солдатов аатын сүгэр спорт саала дириэктэригэр Валентин Павлович Николаевка, тустуу секциятын тренеригэр Аркадий Николаевич Тастыгиҥҥа улуус салалтатын аатыттан Махтал суругу, А.Н. Тастыгиҥҥа Саха сиригэр физическэй култуура 100 сылыгар анаммыт бэлиэни, «Сонор» түмсүү саалйааччыта Маргарита Гаврильевна Уварова Илья Анатольевич уолугар Өркөн Солдатовка, спорт саала дириэктэригэр Валентин Павлович Николаевка, тренер А.Н. Тастыгиҥҥа эҕэрдэ суруктары, сэмэй бэлэхтэри туттардылар.
Күрэхтэһии кылаабынай судьуйата, ССРС спордун маастара, СӨ үөрэҕиириитин туйгуна Андриан Аркадьевич Захаров: «Тустуу турнира биир да эчэйиитэ суох этэҥҥэ ыытылларыгар баҕарабын», – диэн эппитин кэнниттэн икки көбүөрүнэн тустуу турнира саҕаланна. https://t.me/+fnsemAkkXPVkMzli
Эрчим НИКОЛАЕВ, VIII кылаас,
В.М. Новиков-Күннүк Уурастыырап аатынан Эмис орто оскуолата, Амма
Ааптар хаартыскаҕа түһэриилэрэ