Саха АССР тэриллибитэ 100 сылын сэргэ биһиги Хаптаҕай нэһилиэкпитигэр хас да үбүлүөйдээх сылынан биллэр.
Ол курдук социалистическай үлэ героя Герасим Самсонов төрөөбүтэ 100 сыла. Норуот маастара, СССР художниктарын союһун чилиэнэ А. П. Скрябина төрөөбүтэ 95 сыла. Мелодист, Саха сирин ырыа айааччыларын союһун чилиэнэ Анна Барашкова төрөөбүтэ 55 сыла. «Дирин» СХПК, «Кустук» оҕо телевидениета 25 сыллара. Ол үбүлүөйдэр чэрчиллэринэн араас тэрээһиннэр ыытыллаллар.
Муус устар 19 күнүгэр быйылгы хайыһар сезона сабыллыыта Саха АССР уонна Герой Самсонов 100 сыыллаах үбүлүөйдэригэр «100 сыллаах юбилейгэ 100 километр» диэн тэрээһин ананна. Бу күн оскуола бары үөрэнээччилэрэ, учууталлара хайыһарга хаалыктаах хаамыыга турдулар. Тэрээьин суолтатын нэһилиэкпит былааҕа өрө таһаарыллыбыта.
Оскуола бастыҥ хайыһардьыттара Вадим Слепцов, Максим Васильев, Дайаана Чон-Хон-Сун хайыһарга сүүрүү техникатыгар маастар-кылаас биэрдилэр.
Маны тэҥэ сыал ытыыга эмиэ күрэх буолла. Бу юбилейдэргэ анаммыт эстафета олус тэрээһиннээхтик, өрө көтөҕүлээхтик ааста. Бу тэрээһини иилээн-саҕалаан хайыһар тренерэ П. И. Зыков ыытта. Маннык тэрээһиннэр үбүлүөй суолтатын үрдэтэллэр, өйгө-санааҕа иҥэрэллэр.
«Кустук» медиастудия иитиллээччитэ Валя Спиридонова, Хаптаҕай